ಕಾಠ್ಮಂಡು.ಆ೨೯: ನೇಪಾಳ ಮತ್ತು ಚೀನಾ ಗಡಿ ಭಾಗದಲ್ಲಿ ಸಂಭವಿಸಿದ ಹಿಮನದಿ ಕುಸಿತದಿಂದಾಗಿ ಉಂಟಾದ ದಿಢೀರ್ ಭೀಕರ ಪ್ರವಾಹಕ್ಕೆ ನೇಪಾಳದ ರಸುವಾ ಜಿಲ್ಲೆ ಸೇರಿದಂತೆ ಮಧ್ಯ ಭಾಗಗಳು ತತ್ತರಿಸಿವೆ. ದುರಂತ ಸಂಭವಿಸಿ ಮೂರು ದಿನಗಳಾಗಿದ್ದು, ಪ್ರವಾಹಕ್ಕೆ ಬಲಿಯಾದವರ ಸಂಖ್ಯೆ ೬೨೩ಕ್ಕೆ ಏರಿಕೆಯಾಗಿದೆ. ಸುಮಾರು ೨,೫೦೦ಕ್ಕೂ ಹೆಚ್ಚು ಜನರು ಕಾಣೆಯಾಗಿದ್ದು, ಅವರಿಗಾಗಿ ರಕ್ಷಣಾ ಕಾರ್ಯಾಚರಣೆ ತೀವ್ರಗೊಂಡಿದೆ.
ನೇಪಾಳ ಸರ್ಕಾರದ ಮನವಿಯ ಮೇರೆಗೆ ಭಾರತವು ಶನಿವಾರ ೧೧ ಸದಸ್ಯರ ಪ್ರತ್ಯೇಕ ರಕ್ಷಣಾ ಮತ್ತು ವೈದ್ಯಕೀಯ ತಂಡವನ್ನು ನೇಪಾಳಕ್ಕೆ ಕಳುಹಿಸಿಕೊಟ್ಟಿದೆ. ಈ ತಂಡದಲ್ಲಿ ವೈದ್ಯಕೀಯ ಸಿಬ್ಬಂದಿ ಹಾಗೂ ಸುರಂಗ ರಕ್ಷಣಾ ತಜ್ಞರಿದ್ದು ವ್ಯಾಪಕ ಹಾನಿ ಸಂಭವಿಸಿದ ಪ್ರದೇಶಗಳಲ್ಲಿ ಸ್ಥಳೀಯ ಆಡಳಿತದೊಂದಿಗೆ ಸೇರಿ ರಕ್ಷಣಾ ಕಾರ್ಯದಲ್ಲಿ ತೊಡಗಿಸಿಕೊಳ್ಳಲಿದ್ದಾರೆ.
ವಿದೇಶಿ ನೆರವಿಗೆ ಅಸ್ತು ಎಂದ ನೇಪಾಳ
ಆರಂಭದಲ್ಲಿ ತನ್ನದೇ ಭದ್ರತಾ ಪಡೆಗಳಿಂದ ರಕ್ಷಣಾ ಕಾರ್ಯ ನಡೆಸುವುದಾಗಿ ಹೇಳಿ ವಿದೇಶಿ ತಂಡಗಳ ಆಗಮನವನ್ನು ನಿರಾಕರಿಸಿದ್ದ ನೇಪಾಳ, ಇದೀಗ ತನ್ನ ನಿರ್ಧಾರವನ್ನು ಬದಲಿಸಿದೆ. ಪ್ರವಾಹದಲ್ಲಿ ಹಲವು ದೇಶಗಳ ಪ್ರಜೆಗಳು ಕಾಣೆಯಾಗಿರುವುದರಿಂದ ಅಂತರರಾಷ್ಟ್ರೀಯ ಮಟ್ಟದಿಂದ ತೀವ್ರ ಒತ್ತಡ ವ್ಯಕ್ತವಾಗಿತ್ತು. ಹೀಗಾಗಿ, ಸೀಮಿತ ಸಂಖ್ಯೆಯ ವಿದೇಶಿ ತಜ್ಞರು ಮತ್ತು ರಕ್ಷಣಾ ತಂಡಗಳಿಗೆ ಕಾರ್ಯಾಚರಣೆಗೆ ಅನುಮತಿ ನೀಡಲಾಗಿದೆ.
೪೨ ಬೈಲಿ ಸೇತುವೆ ನಿರ್ಮಾಣಕ್ಕೆ ಭಾರತ, ಚೀನಾ ನೆರವು ಕೋರಿಕೆ
ಸಂಪರ್ಕ ಸಂಪೂರ್ಣವಾಗಿ ಕಡಿತಗೊಂಡಿರುವ ರಸ್ತೆ ಹಾಗೂ ಸೇತುವೆಗಳನ್ನು ತಕ್ಷಣವೇ ಪುನರ್ನಿರ್ಮಿಸಲು ನೇಪಾಳ ಸರ್ಕಾರ ಭಾರತ ಮತ್ತು ಚೀನಾದ ಸಹಾಯ ಕೋರಿದೆ. ಶೀಘ್ರವಾಗಿ ಜೋಡಿಸಬಹುದಾದ ೪೨ ’ಬೈಲಿ ಸೇತುವೆಗಳನ್ನು’
ನಿರ್ಮಿಸಿಕೊಡುವಂತೆ ಮನವಿ ಮಾಡಿದೆ.
ಆಗಸ್ಟ್ ೨೬ರಂದು ಚೀನಾ ಗಡಿಗೆ ಹತ್ತಿರವಿರುವ ಹಿಮನದಿಯ ದೊಡ್ಡ ಭಾಗ ಕುಸಿದು ಬಿದ್ದು ‘ಲ್ಹೆಂಡೆ ಖೋಲಾ’ ನದಿಗೆ ಬೃಹತ್ ಪ್ರಮಾಣದ ಮಂಜುಗಡ್ಡೆ, ಕಲ್ಲುಗಳು ಹಾಗೂ ಶೇಖರಿತ ತ್ಯಾಜ್ಯ ಹರಿದುಬಂತು. ಇದು ಮುಂದೆ ‘ಭೋಟೆ ಕೋಶಿ’ ನದಿಯನ್ನು ಸೇರಿ ರಸುವಾ ಜಿಲ್ಲೆಯಲ್ಲಿ ಭೀಕರ ಪ್ರವಾಹ ಸೃಷ್ಟಿಸಿತು. ಜಾಗತಿಕ ತಾಪಮಾನ ಏರಿಕೆಯಿಂದಾಗಿ ಹಿಮಾಲಯ ಪ್ರದೇಶದಲ್ಲಿ ಇಂತಹ ಅಪಾಯಗಳು ಹೆಚ್ಚುತ್ತಿವೆ ಎಂದು ವಿಜ್ಞಾನಿಗಳು ಎಚ್ಚರಿಸಿದ್ದಾರೆ.
