ನವದೆಹಲಿ,ಅ.೨: ಫ್ಲೈದುಬೈ ವಿಮಾನದ ಕಾಕ್‌ಪಿಟ್‌ನಲ್ಲಿ ಸಹ ಪೈಲಟ್‌ನ ದಾಳಿಗೆ ಒಳಗಾಗಿ ಗಾಯಗೊಂಡಿದ್ದ ಭಾರತೀಯ ಪೈಲಟ್ ಕ್ಯಾಪ್ಟನ್ ಸ್ಮಿತ್ ಮಚ್ಚರ್ ಅವರೊಂದಿಗೆ ಪ್ರಧಾನಿ ನರೇಂದ್ರ ಮೋದಿ ದೂರವಾಣಿ ಮೂಲಕ ಮಾತನಾಡಿ, ಅವರ ಧೈರ್ಯವನ್ನು ಶ್ಲಾಘಿಸಿದರು. ಶೀಘ್ರ ಗುಣಮುಖರಾಗುವಂತೆ ಹಾರೈಸಿದರು.
ಪ್ರಧಾನಿ ಜತೆಗಿನ ಮಾತುಕತೆಯ ವೇಳೆ ಸ್ಮಿತ್ ಮಚ್ಚರ್ ಭಾವುಕರಾದರು. ಮೋದಿ ಅವರೊಂದಿಗೆ ಮಾತನಾಡುವುದು ತಮಗೆ ಅತ್ಯಂತ ವಿಶೇಷ ಕ್ಷಣವಾಗಿದ್ದು, ತಾವು ಪ್ರಧಾನಿಯನ್ನು ತಮ್ಮ ದೊಡ್ಡ ಆದರ್ಶವೆಂದು ಭಾವಿಸುವುದಾಗಿ ಹೇಳಿದರು.
‘ದೇಶವೇ ನಿಮ್ಮ ಚೇತರಿಕೆಗೆ ಪ್ರಾರ್ಥಿಸುತ್ತಿದೆ’ಎಂದು ಪ್ರಧಾನಿ ಮೋದಿ ತಿಳಿಸಿದರು. ಇತರರ ಜೀವ ಉಳಿಸಲು ಭಾರತೀಯರು ತಮ್ಮ ಜೀವವನ್ನೇ ಅಪಾಯಕ್ಕೆ ಒಡ್ಡಲು ಸಿದ್ಧರಾಗಿರುತ್ತಾರೆ ಎಂಬ ಸಂದೇಶವನ್ನು ಕ್ಯಾಪ್ಟನ್ ಮಚ್ಚರ್ ತಮ್ಮ ಕಾರ್ಯದ ಮೂಲಕ ತೋರಿಸಿದ್ದಾರೆ ಎಂದು ಮೋದಿ ಹೇಳಿದರು.
ತಮ್ಮ ತಾಯಿ ಗೀತಾ ಬೆನ್ ಅವರನ್ನೂ ಪ್ರಧಾನಿ ಮೋದಿ ಪ್ರಸ್ತಾಪಿಸಿದರು. ಭಗವದ್ಗೀತೆಯ ಮೌಲ್ಯಗಳು ಮತ್ತು ಬೋಧನೆಗಳಿಂದ ಮಗನನ್ನು ಬೆಳೆಸಿರುವುದಾಗಿ ಅವರು ಹೇಳಿದರು. ದಾಳಿಯ ಭೀಕರ ಕ್ಷಣಗಳನ್ನು ಪ್ರಧಾನಿ ಜತೆ ಹಂಚಿಕೊಂಡ ಕ್ಯಾಪ್ಟನ್ ಮಚ್ಚರ್, ತಮಗೆ ಸಂಕಷ್ಟ ಎದುರಾದಾಗಲೆಲ್ಲ ಹನುಮಾನ್ ಚಾಲೀಸಾ ಜಪಿಸುವುದಾಗಿ ತಿಳಿಸಿದರು. ವಿಮಾನದ ಕಾಕ್‌ಪಿಟ್‌ನಲ್ಲಿ ದಾಳಿ ನಡೆದ ಸಂದರ್ಭದಲ್ಲೂ ತಾವು ಹನುಮಾನ್ ಚಾಲೀಸಾ ಜಪಿಸುತ್ತಿದ್ದೆ ಎಂದು ಹೇಳಿದರು.
ದುಬೈಯಿಂದ ಟೆಲ್ ಅವೀವ್‌ಗೆ ತೆರಳುತ್ತಿದ್ದ ಫ್ಲೈದುಬೈ ವಿಮಾನದಲ್ಲಿ ಸಹ ಪೈಲಟ್‌ನಿಂದ ದಾಳಿಗೊಳಗಾದರೂ ಮಚ್ಚರ್ ಕಾಕ್‌ಪಿಟ್ ಬಾಗಿಲು ತೆರೆಯುವ ಮೂಲಕ ಸಹಾಯಕ್ಕಾಗಿ ಕರೆ ನೀಡಿದ್ದರು. ಬಳಿಕ ಪ್ರಯಾಣಿಕರು ಮತ್ತು ಇತರ ಪೈಲಟ್‌ಗಳು ಕಾಕ್‌ಪಿಟ್‌ಗೆ ಪ್ರವೇಶಿಸಿ ಪರಿಸ್ಥಿತಿ ನಿಯಂತ್ರಿಸಲು ನೆರವಾದರು. ವಿಮಾನವನ್ನು ಸೌದಿ ಅರೇಬಿಯಾದ ತಬೂಕ್‌ಗೆ ತಿರುಗಿಸಿ ಸುರಕ್ಷಿತವಾಗಿ ಇಳಿಸಲಾಯಿತು.
ದಾಳಿಯಲ್ಲಿ ಗಾಯಗೊಂಡ ಮಚ್ಚರ್ ಅವರಿಗೆ ತಬೂಕ್‌ನಲ್ಲಿ ಆರಂಭಿಕ ಚಿಕಿತ್ಸೆ ನೀಡಲಾಗಿದ್ದು, ಬಳಿಕ ಹೆಚ್ಚಿನ ಚಿಕಿತ್ಸೆ ಮತ್ತು ಚೇತರಿಕೆಗಾಗಿ ಅಬುಧಾಬಿಗೆ ಸ್ಥಳಾಂತರಿಸಲಾಗಿದೆ. ಅವರ ಆರೋಗ್ಯ ಸ್ಥಿತಿ ಸುಧಾರಿಸುತ್ತಿದೆ ಎಂದು ವರದಿಯಾಗಿದೆ.
ಪ್ರಧಾನಿ ಮೋದಿ ಅವರು ಅ.೧ ರಂದು ಸಾಮಾಜಿಕ ಮಾಧ್ಯಮ ಪೋಸ್ಟ್‌ನಲ್ಲೂ ಕ್ಯಾಪ್ಟನ್ ಮಚ್ಚರ್ ಅವರ ಧೈರ್ಯವನ್ನು ಶ್ಲಾಘಿಸಿ, ಅವರ ಶೌರ್ಯದಿಂದ ದೊಡ್ಡ ದುರಂತ ತಪ್ಪಿಸಲು ನೆರವಾಯಿತು ಎಂದು ಹೇಳಿದ್ದರು.