ಡಲ್ಲಾಸ್,ಜು.೭-೨೦೨೬ರ ಫಿಫಾ ವಿಶ್ವಕಪ್ನಲ್ಲಿ ಪೋರ್ಚುಗಲ್ನ ಅಭಿಯಾನವು ನಿರಾಶಾದಾಯಕ ಅಂತ್ಯ ಕಂಡಿದೆ.ಪಂದ್ಯದ ಕೊನೆಯ ಕ್ಷಣದವರೆಗೂ ತೀವ್ರ ಕುತೂಹಲ ಕೆರಳಿಸಿದ್ದ ಪಂದ್ಯದಲ್ಲಿ ಪೋರ್ಚುಗಲ್ ವಿರುದ್ಧ ಸ್ಪೇನ್ ೧-೦ ಗೋಲುಗಳ ಅಂತರದಿಂದ ರೋಚಕ ಜಯ ಸಾಧಿಸಿದೆ. ಈ ಮೂಲಕ ಸ್ಪೇನ್ ಕ್ವಾರ್ಟರ್-ಫೈನಲ್ ಹಂತಕ್ಕೆ ಲಗ್ಗೆ ಇಟ್ಟಿದೆ.
ಇದರ ಬೆನ್ನಲ್ಲೇ ತಂಡದಲ್ಲಿ ಪ್ರಮುಖ ಬದಲಾವಣೆಯಾಗಿದೆ. ಟೂರ್ನಿಯ ೧೬ರ ಸುತ್ತಿನ ಪಂದ್ಯದಲ್ಲಿ ಸ್ಪೇನ್ ವಿರುದ್ಧ ೦-೧ ಅಂತರದ ಆಘಾತಕಾರಿ ಸೋಲು ಅನುಭವಿಸಿದ ನಂತರ, ಪೋರ್ಚುಗಲ್ ತಂಡದ ಮುಖ್ಯ ಕೋಚ್ ರಾಬರ್ಟೊ ಮಾರ್ಟಿನೆಜ್ ತಮ್ಮ ಸ್ಥಾನಕ್ಕೆ ರಾಜೀನಾಮೆ ನೀಡಿದ್ದಾರೆ.
ಡಲ್ಲಾಸ್ ಕ್ರೀಡಾಂಗಣದಲ್ಲಿ ನಡೆದ ಬಿರುಸಿನ ಪಂದ್ಯದಲ್ಲಿ, ಗಾಯದ ಸಮಯದ ಕೊನೆಯ ಕ್ಷಣಗಳಲ್ಲಿ ಸ್ಪೇನ್ನ ಮೈಕೆಲ್ ಮೆರಿನೊ ಭರ್ಜರಿ ಗೋಲು ಬಾರಿಸಿದರು. ಈ ಏಕೈಕ ಗೋಲು ಪೋರ್ಚುಗಲ್ನ ಕ್ವಾರ್ಟರ್-ಫೈನಲ್ ತಲುಪುವ ಭರವಸೆಯನ್ನು ಸಂಪೂರ್ಣವಾಗಿ ಛಿದ್ರಗೊಳಿಸಿತು.
ಮೊದಲಾರ್ಧದಲ್ಲಿ ತಪ್ಪಿದ ಅವಕಾಶಗಳು
ಪಂದ್ಯದ ಮೊದಲಾ ರ್ಧವು ಸಾಕಷ್ಟು ರೋಮಾಂಚಕಾರಿಯಾಗಿದ್ದರೂ, ಉಭಯ ತಂಡಗಳು ಗೋಲು ಗಳಿಸುವಲ್ಲಿ ವಿಫಲವಾದವು. ಸ್ಪೇನ್ನ ಮೈಕೆಲ್ ಒಯರ್ಜಾಬಲ್ಗೆ ತಂಡಕ್ಕೆ ಮುನ್ನಡೆ ತಂದುಕೊಡುವ ಉತ್ತಮ ಅವಕಾಶವಿತ್ತಾದರೂ, ಅವರ ಪ್ರಯತ್ನ ಗುರಿ ತಪ್ಪಿತು. ಮತ್ತೊಂದೆಡೆ, ಅಲೆಕ್ಸ್ ಬೇನಾ ಬಾರಿಸಿದ ಅತ್ಯುತ್ತಮ ಹೊಡೆತವನ್ನು ಪೋರ್ಚುಗಲ್ನ ಗೋಲ್ಕೀಪರ್ ಡಿಯೋಗೊ ಕೋಸ್ಟಾ ಅತ್ಯಂತ ಅದ್ಭುತವಾಗಿ ತಡೆದು ಕಾರ್ನರ್ ಆಗಿ ಪರಿವರ್ತಿಸುವಲ್ಲಿ ಯಶಸ್ವಿಯಾದರು.
ಪೋರ್ಚುಗಲ್ ತಿರುಗೇಟು
ಪೋರ್ಚುಗಲ್ ಪರ ಸ್ಟಾರ್ ಆಟಗಾರ ಕ್ರಿಸ್ಟಿಯಾನೊ ರೊನಾಲ್ಡೊ ಸ್ಪೇನ್ ರಕ್ಷಣಾ ಕೋಟೆಯ ಮೇಲೆ ಸರಣಿ ದಾಳಿ ನಡೆಸಿ ಒತ್ತಡ ಹೇರಿದರು. ನುನೊ ಮೆಂಡೆಸ್ ಬಾರಿಸಿದ ಶಾಟ್ ಎದುರಾಳಿ ಆಟಗಾರನಿಗೆ ತಗುಲಿ ಕ್ರಾಸ್ಬಾರ್ಗೆ ಬಡಿದಿದ್ದರಿಂದ ಪೋರ್ಚುಗಲ್ ಅತ್ಯಲ್ಪ ಅಂತರದಲ್ಲಿ ಗೋಲು ಗಳಿಸುವ ಸುವರ್ಣಾವಕಾಶವನ್ನು ಕಳೆದುಕೊಂಡಿತು.
ಮೆರಿನೊ ಮ್ಯಾಜಿಕ್ ಸ್ಪೇನ್ಗೆ ವಿಜಯ
ದ್ವಿತೀಯಾರ್ಧದಲ್ಲಿ ಎರಡೂ ತಂಡಗಳು ತೀವ್ರ ಜಾಗರೂಕತೆಯಿಂದ ಆಡಿದವು. ಪಂದ್ಯವು ಹೆಚ್ಚುವರಿ ಸಮಯದತ್ತ ಸಾಗುವ ಮುನ್ಸೂಚನೆ ಇತ್ತು. ಆದರೆ, ೯೦ನೇ ನಿಮಿಷದಲ್ಲಿ ಬದಲಿ ಆಟಗಾರನಾಗಿ ಕಣಕ್ಕಿಳಿದ ಫೆರಾನ್ ಟೊರೆಸ್ ನೀಡಿದ ಅದ್ಭುತ ಪಾಸ್ ಅನ್ನು ಮೈಕೆಲ್ ಮೆರಿನೊ ಅತ್ಯಂತ ನಿಖರವಾಗಿ ಗೋಲು ಪೆಟ್ಟಿಗೆಗೆ ತಳ್ಳಿದರು. ಈ ಏಕೈಕ ಗೋಲಿನ ನೆರವಿನಿಂದ ಸ್ಪೇನ್ ೧-೦ ಅಂತರದಲ್ಲಿ ರೋಚಕ ಜಯವನ್ನು ತನ್ನದಾಗಿಸಿಕೊಂಡಿತು.
ಕ್ವಾರ್ಟರ್-ಫೈನಲ್ ಪ್ರವೇಶಿಸಿರುವ ಸ್ಪೇನ್, ಮುಂದಿನ ಪಂದ್ಯದಲ್ಲಿ ಯುನೈಟೆಡ್ ಸ್ಟೇಟ್ಸ್ ಮತ್ತು ಬೆಲ್ಜಿಯಂ ನಡುವಿನ ಪಂದ್ಯದ ವಿಜೇತರನ್ನು ಎದು ರಿಸಲಿದೆ.
ರೊನಾಲ್ಡೊ ಸುದೀರ್ಘ
ವಿಶ್ವಕಪ್ ವೃತ್ತಿ ಜೀವನಕ್ಕೆ ತೆರೆ!
ಫುಟ್ಬಾಲ್ ಲೋಕದ ಸಾರ್ವಕಾಲಿಕ ಶ್ರೇಷ್ಠ ಆಟಗಾರ ಕ್ರಿಸ್ಟಿಯಾನೊ ರೊನಾಲ್ಡೊ ಅವರ ವಿಶ್ವಕಪ್ ವೃತ್ತಿಜೀವನ ಅಧಿಕೃತವಾಗಿ ಕೊನೆಗೊಂಡಿದೆ. ಇದು ಅವರ ವೃತ್ತಿಜೀವನದ ಕೊನೆಯ ವಿಶ್ವಕಪ್ ಪಂದ್ಯವಾಗಿದ್ದು, ಪಂದ್ಯಕ್ಕೂ ಮುಂಚೆಯೇ ೪೧ ವರ್ಷದ ಈ ದಿಗ್ಗಜ ತಾರೆ ಇದು ತಮ್ಮ ಕೊನೆಯ ವಿಶ್ವಕಪ್ ಟೂರ್ನಿ ಎಂಬುದನ್ನು ಸ್ಪಷ್ಟಪಡಿಸಿದ್ದರು.
ರೊನಾಲ್ಡೊ ತಮ್ಮ ಸುದೀರ್ಘ ವಿಶ್ವಕಪ್ ವೃತ್ತಿಜೀವನದಲ್ಲಿ ಒಟ್ಟು ೨೨ ಪಂದ್ಯಗಳಲ್ಲಿ ೮ ಗೋಲುಗಳನ್ನು ಗಳಿಸಿದ್ದಾರೆ. ಅಲ್ಲದೆ, ಐದು ವಿಭಿನ್ನ ವಿಶ್ವಕಪ್ ಆವೃತ್ತಿಗಳಲ್ಲಿ (೨೦೦೬, ೨೦೧೦, ೨೦೧೪, ೨೦೧೮, ೨೦೨೨) ಗೋಲು ಗಳಿಸಿದ ವಿಶ್ವದ ಮೊದಲ ಪುರುಷ ಆಟಗಾರ ಎಂಬ ಐತಿಹಾಸಿಕ ದಾಖಲೆಯನ್ನೂ ಅವರು ತಮ್ಮ ಹೆಸರಿಗೆ ಬರೆದುಕೊಂಡಿದ್ದಾರೆ. ಆದಾಗ್ಯೂ, ಪೋರ್ಚುಗಲ್ ಪರ ವಿಶ್ವಕಪ್ ಟ್ರೋಫಿಯನ್ನು ಎತ್ತಿಹಿಡಿಯಬೇಕೆಂಬ ಅವರ ಅಂತಿಮ ಕನಸು ಮಾತ್ರ ನನಸಾಗದೆ ಉಳಿಯಿತು.
ಕೋಚ್ ಪ್ರತಿಕ್ರಿಯೆ: ಪಂದ್ಯದ ಬಳಿಕ ಮಾತನಾಡಿದ ಮಾರ್ಟಿನೆಜ್, ತಮ್ಮ ಆಟಗಾರರ ಹೋರಾಟದ ಗುಣವನ್ನು ಶ್ಲಾಘಿಸಿದರು. “ನಮ್ಮ ತಂಡವು ಪಂದ್ಯವನ್ನು ಹೆಚ್ಚುವರಿ ಸಮಯಕ್ಕೆ ಕೊಂಡೊಯ್ಯಲು ಸಂಪೂರ್ಣ ಅರ್ಹವಾಗಿತ್ತು, ಆದರೆ ದುರದೃಷ್ಟವಶಾತ್ ಅದೃಷ್ಟ ನಮ್ಮ ಕೈ ಹಿಡಿಯಲಿಲ್ಲ ಎಂದು ಅವರು ಬೇಸರ ವ್ಯಕ್ತಪಡಿಸಿದ್ದಾರೆ.