ಮಾನವ ಸಮಾಜವನ್ನು ಇಂದು ಕಾಡುತ್ತಿರುವ ಅತ್ಯಂತ ಗಂಭೀರ ಹಾಗೂ ಆತಂಕಕಾರಿ ಜಾಗತಿಕ ಆರೋಗ್ಯ ಸಮಸ್ಯೆಗಳಲ್ಲಿ ಔಷಧ ಹಾಗೂ ಮಾದಕ ದ್ರವ್ಯಗಳ ಅತಿಯಾದ ಸೇವನೆ ಪ್ರಮುಖವಾದದ್ದು. ಔಷಧಗಳ ಅತಿಯಾದ ಬಳಕೆಯಿಂದ ಸಾವನ್ನಪ್ಪುವವರ ಸಂಖ್ಯೆ ಜಗತ್ತಿನಾದ್ಯಂತ ವರ್ಷದಿಂದ ವರ್ಷಕ್ಕೆ ಹೆಚ್ಚಾಗುತ್ತಿದೆ. ಈ ದುರಂತದ ಕುರಿತು ಜನರಲ್ಲಿ ಅರಿವು ಮೂಡಿಸಲು, ದುರಂತಕ್ಕೆ ಬಲಿಯಾದವರನ್ನು ಸ್ಮರಿಸಲು ಮತ್ತು ಅವರ ಕುಟುಂಬಗಳ ದುಃಖದಲ್ಲಿ ಭಾಗಿಗಳಾಗಲು ಪ್ರತಿ ವರ್ಷ ಆಗಸ್ಟ್ 31 ರಂದು “ಅಂತರರಾಷ್ಟ್ರೀಯ ಡ್ರಗ್ ಓವರ್ಡೋಸ್ ಜಾಗೃತಿ ದಿನ” ವನ್ನಾಗಿ ಆಚರಿಸಲಾಗುತ್ತದೆ.
ಇತಿಹಾಸ ಮತ್ತು ಮೂಲ
ಅಂತರರಾಷ್ಟ್ರೀಯ ಡ್ರಗ್ ಓವರ್ಡೋಸ್ ಜಾಗೃತಿ ದಿನದ ಆಚರಣೆಯು 2001 ರಲ್ಲಿ ಆಸ್ಟ್ರೇಲಿಯಾದ ಮೆಲ್ಬೋರ್ನ್ ನಗರದ ಸ್ಟಿ. ಕಿಲ್ಡಾದಲ್ಲಿ ಪ್ರಾರಂಭವಾಯಿತು. ಸ್ಯಾಲಿ ಜೆ. ಫಿನ್ ಎಂಬುವವರು ‘ಸಾಲ್ವೇಶನ್ ಆರ್ಮಿ ಕ್ರೈಸಿಸ್ ಸೆಂಟರ್’ನಲ್ಲಿ ಈ ಆಚರಣೆಗೆ ಬುನಾದಿ ಹಾಕಿದರು. ಆರಂಭದಲ್ಲಿ ಸ್ಥಳೀಯ ಮಟ್ಟದ ಜಾಗೃತಿ ಕಾರ್ಯಕ್ರಮವಾಗಿದ್ದ ಇದು, ಕಾಲಕ್ರಮೇಣ ಜಾಗತಿಕ ಅಭಿಯಾನವಾಗಿ ಮಾರ್ಪಟ್ಟಿತು. 2012 ರಿಂದ ಆಸ್ಟ್ರೇಲಿಯಾದ ‘ಪೆನಿಂಗ್ಟನ್ ಇನ್ಸ್ಟಿಟ್ಯೂಟ್’ ಎಂಬ ಲಾಭರಹಿತ ಸಂಸ್ಥೆಯು ಈ ಜಾಗತಿಕ ಅಭಿಯಾನವನ್ನು ಸಂಯೋಜಿಸುತ್ತಿದೆ.
ಆಚರಣೆಯ ಮುಖ್ಯ ಉದ್ದೇಶಗಳು
ಜಾಗೃತಿ ಮೂಡಿಸುವುದು: ಅಪಥ್ಯ ಅಥವಾ ಅತಿಯಾದ ಮಾದಕ ದ್ರವ್ಯ ಸೇವನೆಯಿಂದ ಆಗುವ ಅಪಾಯಗಳು ಮತ್ತು ಸಾವುಗಳ ಕುರಿತು ಸಾರ್ವಜನಿಕರಿಗೆ ವೈಜ್ಞಾನಿಕ ಮಾಹಿತಿ ನೀಡುವುದು.
ಮೃತಪಟ್ಟವರ ಸ್ಮರಣೆ: ಓವರ್ಡೋಸ್ನಿಂದಾಗಿ ಪ್ರಾಣ ಕಳೆದುಕೊಂಡ ವ್ಯಕ್ತಿಗಳಿಗೆ ಗೌರವ ಸಲ್ಲಿಸುವುದು ಮತ್ತು ಅವರ ನೆನಪನ್ನು ಜೀವಂತವಾಗಿಡುವುದು.
ಸಾಮಾಜಿಕ ಕಳಂಕವನ್ನು ಕಡಿಮೆ ಮಾಡುವುದು: ಮಾದಕ ವ್ಯಸನಿಗಳನ್ನು ಅಪರಾಧಿಗಳಂತೆ ನೋಡದೆ, ಅವರನ್ನು ರೋಗಿಗಳೆಂದು ಪರಿಗಣಿಸಿ ಮಾನವೀಯತೆಯಿಂದ ನೆರವಾಗುವುದು.
ಬಂಧುಗಳ ದುಃಖಕ್ಕೆ ಸಾಂತ್ವನ: ಪ್ರೀತಿಯ ಪಾತ್ರರನ್ನು ಕಳೆದುಕೊಂಡ ಕುಟುಂಬದವರು ಅನುಭವಿಸುವ ಅಪಾರ ದುಃಖ ಮತ್ತು ಅಪರಾಧ ಪ್ರಜ್ಞೆಯನ್ನು ಹಂಚಿಕೊಂಡು ಅವರಿಗೆ ಮಾನಸಿಕ ಬೆಂಬಲ ನೀಡುವುದು.
ಸಂಕೇತಗಳು ಮತ್ತು ಪ್ರಮುಖ ವಿಷಯಗಳು
ಬೆಳ್ಳಿ ಬಣ್ಣದ ರಿಬ್ಬನ್ : ಈ ದಿನದ ಅಧಿಕೃತ ಸಂಕೇತವೆಂದರೆ ‘ಬೆಳ್ಳಿ ಬಣ್ಣದ ರಿಬ್ಬನ್’ ಮತ್ತು ನೇರಳೆ ಬಣ್ಣ. ಬೆಳ್ಳಿ ಬಣ್ಣವು ಜೀವ ಕಳೆದುಕೊಂಡವರ ಸ್ಮರಣೆ ಮತ್ತು ದುಃಖವನ್ನು ಸೂಚಿಸಿದರೆ, ನೇರಳೆ ಬಣ್ಣವು ಬೆಂಬಲ ಮತ್ತು ಭರವಸೆಯನ್ನು ಪ್ರತಿನಿಧಿಸುತ್ತದೆ.
ಧ್ಯೇಯವಾಕ್ಯ: “ನೆನಪಿಸಿಕೊಳ್ಳುವ ಸಮಯ, ಕಾರ್ಯಪ್ರವೃತ್ತರಾಗುವ ಸಮಯ” ಎನ್ನುವುದು ಈ ಆಂದೋಲನದ ಪ್ರಮುಖ ಘೋಷಣೆಯಾಗಿದೆ.
ಡ್ರಗ್ ಓವರ್ಡೋಸ್ ಎಂದರೇನು ಮತ್ತು ಅದರ ಲಕ್ಷಣಗಳು
ಒಬ್ಬ ವ್ಯಕ್ತಿಯು ತನ್ನ ದೇಹವು ತಡೆದುಕೊಳ್ಳಬಹುದಾದ ಸಾಮಥ್ರ್ಯಕ್ಕಿಂತ ಹೆಚ್ಚಿನ ಪ್ರಮಾಣದಲ್ಲಿ ಔಷಧ ಅಥವಾ ಮಾದಕ ದ್ರವ್ಯಗಳನ್ನು ತೆಗೆದುಕೊಂಡಾಗ ‘ಓವರ್ಡೋಸ್’ ಸಂಭವಿಸುತ್ತದೆ. ಇದು ಅಕ್ರಮ ಮಾದಕ ದ್ರವ್ಯಗಳಿಂದಷ್ಟೇ ಅಲ್ಲದೆ, ವೈದ್ಯರು ಬರೆದುಕೊಟ್ಟ ನಿದ್ರೆ ಮಾತ್ರೆಗಳು ಅಥವಾ ನೋವು ನಿವಾರಕಗಳಿಂದಲೂ ಸಂಭವಿಸಬಹುದು.
ಓವರ್ಡೋಸ್ನ ಪ್ರಮುಖ ಲಕ್ಷಣಗಳು:
- ಅತಿಯಾದ ತಲೆತಿರುಗುವಿಕೆ ಅಥವಾ ಪ್ರಜ್ಞೆ ತಪ್ಪುವುದು.
- ಉಸಿರಾಟ ನಿಧಾನವಾಗುವುದು ಅಥವಾ ಉಸಿರಾಡಲು ಕಷ್ಟವಾಗುವುದು.
- ಚರ್ಮ, ತುಟಿ ಅಥವಾ ಉಗುರುಗಳು ನೀಲಿ/ಸಾಂಬೂದು ಬಣ್ಣಕ್ಕೆ ತಿರುಗುವುದು.
- ಶರೀರ ತಂಪಾಗುವುದು ಮತ್ತು ಕಣ್ಣಿನ ಪಾಪೆಗಳು ಅತ್ಯಂತ ಸಣ್ಣದಾಗುವುದು
- ಗೊರಕೆ ಹೊಡೆಯುವಂತಹ ಅಥವಾ ಗಂಟಲಿನಲ್ಲಿ ನೀರು ಸಿಲುಕಿದಂತಹ ಶಬ್ದ ಬರುವುದು.
ತಡೆಗಟ್ಟುವಿಕೆ ಮತ್ತು ಜಾಗತಿಕ ಪರಿಹಾರ ಮಾರ್ಗಗಳು
ಮಾದಕ ದ್ರವ್ಯಗಳ ಅತಿಯಾದ ಸೇವನೆಯಿಂದಾಗುವ ಸಾವುಗಳನ್ನು ತಡೆಗಟ್ಟಲು ಜಾಗತಿಕ ಮಟ್ಟದಲ್ಲಿ ಹಲವು ಕ್ರಮಗಳನ್ನು ಕೈಗೊಳ್ಳಲಾಗುತ್ತಿದೆ: - ತುರ್ತು ಚಿಕಿತ್ಸಾ ಔಷಧಗಳು: ಓಪಿಯಾಯ್ಡ್ ಓವರ್ಡೋಸ್ ಆದ ತಕ್ಷಣ ‘ನಲೋಕ್ಸೋನ್’ ಎಂಬ ಜೀವ ರಕ್ಷಕ ಔಷಧವನ್ನು ನೀಡುವ ಮೂಲಕ ಜೀವ ಉಳಿಸಬಹುದು.
- ಮಾನಸಿಕ ಪುನರ್ವಸತಿ ಕೇಂದ್ರಗಳು: ವ್ಯಸನಿಗಳಿಗೆ ಶಿಕ್ಷೆ ವಿಧಿಸುವ ಬದಲು, ಪುನರ್ವಸತಿ ಸೂಕ್ತ ಚಿಕಿತ್ಸೆ ಮತ್ತು ಕೌನ್ಸೆಲಿಂಗ್ ನೀಡುವುದು.
- ಔಷಧಗಳ ಕಟ್ಟುನಿಟ್ಟಿನ ನಿಯಂತ್ರಣ: ನೋವು ನಿವಾರಕ ಹಾಗೂ ಮದ್ಯಪಾನ ಉತ್ತೇಜಕ ಮಾತ್ರೆಗಳನ್ನು ವೈದ್ಯರ ಚೀಟಿ ಇಲ್ಲದೆ ಮಾರಾಟ ಮಾಡುವುದನ್ನು ಕಟ್ಟುನಿಟ್ಟಾಗಿ ನಿಷೇಧಿಸುವುದು.
- ಸಾಮಾಜಿಕ ಜಾಗೃತಿ: ಶಾಲಾ-ಕಾಲೇಜುಗಳಲ್ಲಿ ಯುವಜನತೆಗೆ ಮಾದಕ ದ್ರವ್ಯಗಳ ದುಷ್ಪರಿಣಾಮಗಳ ಕುರಿತು ನಿರಂತರ ಶಿಕ್ಷಣ ನೀಡುವುದು.
ಅಂತರರಾಷ್ಟ್ರೀಯ ಡ್ರಗ್ ಓವರ್ಡೋಸ್ ಜಾಗೃತಿ ದಿನವು ಕೇವಲ ಒಂದು ದಿನದ ಆಚರಣೆಯಷ್ಟೇ ಅಲ್ಲ, ಅದು ಜೀವಗಳನ್ನು ಉಳಿಸುವ ಸಂಕಲ್ಪ. ಮಾದಕ ದ್ರವ್ಯ ವ್ಯಸನವು ಕೇವಲ ಒಬ್ಬ ವ್ಯಕ್ತಿಯ ಸಮಸ್ಯೆಯಲ್ಲ; ಅದು ಇಡೀ ಸಮಾಜ ಮತ್ತು ಕುಟುಂಬದ ಮೇಲಾಗುವ ಪ್ರಹಾರ. ವ್ಯಸನಿಗಳನ್ನು ದ್ವೇಷಿಸದೆ, ಪ್ರೀತಿ ಮತ್ತು ವೈದ್ಯಕೀಯ ನೆರವಿನ ಮೂಲಕ ಅವರನ್ನು ಸಮಾಜದ ಮುಖ್ಯವಾಹಿನಿಗೆ ತರುವುದು ನಮ್ಮೆಲ್ಲರ ಜವಾಬ್ದಾರಿಯಾಗಿದೆ. ಪ್ರತಿಯೊಂದು ಜೀವವೂ ಅಮೂಲ್ಯವಾದದ್ದು, ಸರಿಯಾದ ಸಮಯಕ್ಕೆ ಸಿಗುವ ಜಾಗೃತಿ ಮತ್ತು ನೆರವು ನೂರಾರು ಜೀವಗಳನ್ನು ಉಳಿಸಬಲ್ಲದು.
