ಮಂಗಳೂರು: ರೊಸಾರಿಯೊ ಕ್ಯಾಥೆಡ್ರಲ್, ಮಂಗಳೂರು, ಎಲ್ಲಾ ವಾರ್ಡ್ಗಳ ಸಹಯೋಗದೊಂದಿಗೆ ‘ಪೌಸಾ ಗಮ್ಮತ್ ೨೦೨೬’ ಎಂಬ ಸಾಂಪ್ರದಾಯಿಕ ಮುಂಗಾರು ಆಹಾರೋತ್ಸವ ಮತ್ತು ಮನರಂಜನಾ ಕಾರ್ಯಕ್ರಮವನ್ನು ಆಗಸ್ಟ್ ೨೩, ಭಾನುವಾರ, ರೊಸಾರಿಯೋ ಕಲ್ಚರಲ್ ಹಾಲ್ನಲ್ಲಿ ಆಯೋಜಿಸಿತು.
ಕರಾವಳಿ ಕರ್ನಾಟಕದ ಶ್ರೀಮಂತ ಮುಂಗಾರು ಸಂಪ್ರದಾಯಗಳಿಂದ ಪ್ರೇರಿತವಾದ ಪೌಸಾ ಗಮ್ಮತ್, ಕರಾವಳಿ ಪ್ರದೇಶದ ಆಹಾರ, ಸಂಸ್ಕೃತಿ ಮತ್ತು ಜೀವನಶೈಲಿಯ ವೈವಿಧ್ಯತೆಯನ್ನು ಬಿಂಬಿಸುವ ಸಂಭ್ರಮದ ಆಚರಣೆಯಾಗಿತ್ತು. ಸಾಂಪ್ರದಾಯಿಕ ಅಡುಗೆಗಳು, ಸಂಪ್ರದಾಯಗಳು ಮತ್ತು ಸಾಂಸ್ಕೃತಿಕ ಆಚರಣೆಗಳನ್ನು ಪರಿಚಯಿಸುವುದರ ಜೊತೆಗೆ, ಸಂತೋಷ ಮತ್ತು ಸೌಹಾರ್ದತೆಯೊಂದಿಗೆ ಪ್ಯಾರಿಷ್ ಸಮುದಾಯವನ್ನು ಒಂದೆಡೆ ಸೇರಿಸುವ ವೇದಿಕೆಯಾಗಿಯೂ ಈ ಕಾರ್ಯಕ್ರಮ ಮೂಡಿಬಂದಿತು.
ಕಾರ್ಯಕ್ರಮವು ಸಾಂಪ್ರದಾಯಿಕ ಮೆರವಣಿಗೆಯೊಂದಿಗೆ ಆರಂಭಗೊಂಡಿತು. ಬಣ್ಣಬಣ್ಣದ ಸಾಂಪ್ರದಾಯಿಕ ಉಡುಪುಗಳನ್ನು ಧರಿಸಿದವರು ಋತುಮಾನಕ್ಕೆ ತಕ್ಕ ಕೃಷಿ ಉತ್ಪನ್ನಗಳು, ತರಕಾರಿಗಳು ಹಾಗೂ ಗ್ರಾಮೀಣ ಮತ್ತು ಕರಾವಳಿ ಜೀವನಕ್ಕೆ ಸಂಬಂಧಿಸಿದ ವಿವಿಧ ವಸ್ತುಗಳನ್ನು ಬುಟ್ಟಿಗಳಲ್ಲಿ ಹೊತ್ತು ಮೆರವಣಿಗೆಯಲ್ಲಿ ಭಾಗವಹಿಸಿದರು. ಈ ಮೆರವಣಿಗೆ ಸಾಂಪ್ರದಾಯಿಕ ಗ್ರಾಮೀಣ ಬದುಕಿನ ಸೊಬಗನ್ನು ಮರುಸೃಷ್ಟಿಸಿ, ಕಾರ್ಯಕ್ರಮಕ್ಕೆ ವಿಶಿಷ್ಟ ಸಾಂಸ್ಕೃತಿಕ ಮೆರುಗನ್ನು ನೀಡಿತು.
ರೊಸಾರಿಯೊ ಕ್ಯಾಥೆಡ್ರಲ್ನ ಧರ್ಮಗುರು ಫಾದರ್ ವಲೇರಿಯನ್ ಡಿ’ಸೋಜಾ ಅವರು ಕರಾವಳಿ ಪ್ರದೇಶದ ಕೃಷಿ ಮತ್ತು ಸುಗ್ಗಿಯ ಸಂಪ್ರದಾಯವನ್ನು ಬಿಂಬಿಸುವ ಸಾಂಪ್ರದಾಯಿಕ ಅಕ್ಕಿ ಕುಟ್ಟುವ ಪ್ರದರ್ಶನದ ಮೂಲಕ ಕಾರ್ಯಕ್ರಮವನ್ನು ವಿಶಿಷ್ಟವಾಗಿ ಉದ್ಘಾಟಿಸಿದರು.
ಈ ಸಂದರ್ಭದಲ್ಲಿ ಫಾ. ವಲೇರಿಯನ್ ಫರ್ನಾಂಡಿಸ್, ಫಾ. ಪ್ರದೀಪ್ ರೋಡ್ರಿಗಸ್, ಪಾಲನಾ ಮಂಡಳಿಯ ಉಪಾಧ್ಯಕ್ಷ ಸಿರಿಲ್ ರೊಸಾರಿಯೊ, ಕಾರ್ಯದರ್ಶಿ ಐಡಾ ಫುರ್ಟಾಡೊ ಹಾಗೂ ಸರ್ವ ಆಯೋಗಗಳ ಸಂಯೋಜಕ ಆಲ್ಡ್ರಿನ್ ವಾಜ್ ಉಪಸ್ಥಿತರಿದ್ದರು.
ವಿವಿಧ ವಾರ್ಡ್ಗಳು ಸಿದ್ಧಪಡಿಸಿದ ಸಾಂಪ್ರದಾಯಿಕ ಮುಂಗಾರು ಖಾದ್ಯಗಳ ವೈವಿಧ್ಯಮಯ ಮೇಳವು ಕಾರ್ಯಕ್ರಮದ ಪ್ರಮುಖ ಆಕರ್ಷಣೆಯಾಗಿತ್ತು. ಚರ್ಚ್ ಸದಸ್ಯರಿಗೆ ಕರಾವಳಿ ಪಾಕಪದ್ಧತಿಯ ಶ್ರೀಮಂತ ಮತ್ತು ವೈವಿಧ್ಯಮಯ ರುಚಿಗಳನ್ನು ಸವಿಯುವ ಅವಕಾಶ ದೊರೆಯಿತು. ಇದರೊಂದಿಗೆ ನಡೆದ ವೈವಿಧ್ಯಮಯ ಸಾಂಸ್ಕೃತಿಕ ಕಾರ್ಯಕ್ರಮಗಳು ಸಂಭ್ರಮಕ್ಕೆ ಮತ್ತಷ್ಟು ಮೆರುಗು ನೀಡಿದವು.
ಸಾಂಪ್ರದಾಯಿಕ ಮೆರವಣಿಗೆಯನ್ನು ಸ್ಟೀವನ್ ಫರ್ನಾಂಡಿಸ್ ಮತ್ತು ಮೆಲ್ವಿನ್ ಸಿಕ್ವೇರಾ ಮುನ್ನಡೆಸಿದರು. ಸಾಂಪ್ರದಾಯಿಕ ಕಾರ್ಯಕ್ರಮವನ್ನು ವಿನಯ್ ಸೆರ್ರಾವೋ ನಿರೂಪಿಸಿದರು. ಸಾಂಸ್ಕೃತಿಕ ಕಾರ್ಯಕ್ರಮವನ್ನು ಮಿಶೆಲ್ ಡಿಸೋಜಾ ಮತ್ತು ವಿನೋಲಾ ಡಿಸೋಜಾ ನಿರೂಪಿಸಿದರು.
ಕಾರ್ಯಕ್ರಮವು ಹೌಸಿ ಹೌಸಿ ಆಟದೊಂದಿಗೆ ಮುಕ್ತಾಯಗೊಂಡಿತು. ಇದರಲ್ಲಿ ವಿವೆಲಾ ಸೆರ್ರಾವೋ ಅವರು ಖs ೧೦,೦೦೦ ಮೊತ್ತದ ಫುಲ್ ಹೌಸ್ ಬಹುಮಾನವನ್ನು ಗೆದ್ದರು.
