ಮುಂಬೈ, ಸೆ. 2- ನೇಪಾಳದಲ್ಲಿ ಇತ್ತೀಚೆಗೆ ಸಂಭವಿಸಿದ ಪ್ರಳಯಾಂತಕ ಪ್ರವಾಹದಿಂದ ತೀವ್ರ ಸಂಕಷ್ಟಕ್ಕೆ ಸಿಲುಕಿರುವ ಜನರಿಗೆ ನೆರವಿನ ಹಸ್ತ ಚಾಚಲು ಬಾಲಿವುಡ್ನ ಖ್ಯಾತ ನಟ ಹಾಗೂ ಸಮಾಜ ಸೇವಕ ಸೋನು ಸೂದ್ ಅವರು ಕಠ್ಮಂಡುವಿಗೆ ಧಾವಿಸಿದ್ದಾರೆ. ಸುಮಾರು 900ಕ್ಕೂ ಹೆಚ್ಚು ಜನರ ದಾರುಣ ಸಾವಿಗೆ ಕಾರಣವಾಗಿ, ಲಕ್ಷಾಂತರ ಜನರನ್ನು ನಿರಾಶ್ರಿತರನ್ನಾಗಿ ಮಾಡಿರುವ ಈ ನೈಸರ್ಗಿಕ ವಿಕೋಪದ ಸ್ಥಳಕ್ಕೆ ಸ್ವತಃ ಭೇಟಿ ನೀಡಿರುವ ಅವರು, ಸಂತ್ರಸ್ತರ ಕಣ್ಣೀರು ಒರೆಸುವ ಪ್ರಾಮಾಣಿಕ ಪ್ರಯತ್ನದಲ್ಲಿದ್ದಾರೆ. ಅವರ ಒಡೆತನದ ‘ಸೂದ್ ಚಾರಿಟಿ ಫೌಂಡೇಶನ್’ನ ವಿಶೇಷ ತಂಡವು ಭಾರತದಿಂದ ಬೃಹತ್ ಪ್ರಮಾಣದ ಪರಿಹಾರ ಸಾಮಗ್ರಿಗಳೊಂದಿಗೆ ನೇಪಾಳಕ್ಕೆ ಆಗಮಿಸಿದ್ದು, ಆಹಾರ ಧಾನ್ಯಗಳ ಪಡಿತರ, ಬೆಚ್ಚಗಿನ ಕಂಬಳಿಗಳು ಮತ್ತು ತುರ್ತು ಅಗತ್ಯ ವಸ್ತುಗಳನ್ನು ಒಳಗೊಂಡ ಪರಿಹಾರ ಸಾಮಗ್ರಿಗಳನ್ನು ಪ್ರವಾಹ ಪೀಡಿತರಿಗೆ ತಕ್ಷಣವೇ ತಲುಪಿಸುವ ಕಾರ್ಯದಲ್ಲಿ ನಿರತವಾಗಿದೆ.
?ಸ್ಥಳೀಯ ಪರಿಸ್ಥಿತಿಯನ್ನು ಹತ್ತಿರದಿಂದ ವೀಕ್ಷಿಸಿ, ಪ್ರವಾಹದಿಂದ ಸಂಕಷ್ಟಕ್ಕೊಳಗಾದ ಕುಟುಂಬಗಳನ್ನು ಖುದ್ದಾಗಿ ಭೇಟಿ ಮಾಡಿದ ಸೋನು ಸೂದ್, ಈ ಬಿಕ್ಕಟ್ಟಿನ ಸಮಯದಲ್ಲಿ ಅಸಹಾಯಕರ ಪರವಾಗಿ ನಿಲ್ಲುವುದು ಪ್ರತಿಯೊಬ್ಬರ ಮಾನವೀಯ ಕರ್ತವ್ಯವಾಗಿದೆ ಎಂದು ಮಾರ್ಮಿಕವಾಗಿ ನುಡಿದಿದ್ದಾರೆ.
ತಮ್ಮ ಫೌಂಡೇಶನ್ನ ಪರಿಹಾರ ಕಾರ್ಯಗಳು ಕೇವಲ ತಕ್ಷಣದ ನೆರವಿಗೆಷ್ಟೇ ಸೀಮಿತವಾಗಿರದೆ, ಪ್ರವಾಹ ಪೀಡಿತರು ಸಂಪೂರ್ಣವಾಗಿ ಚೇತರಿಸಿಕೊಂಡು ತಮ್ಮ ಜೀವನವನ್ನು ಮರುಕಟ್ಟಿಕೊಳ್ಳುವವರೆಗೆ ಅಂದರೆ ಮುಂಬರುವ ಹಲವಾರು ತಿಂಗಳುಗಳ ಕಾಲ ನಿರಂತರವಾಗಿ ಸರಬರಾಜು ಕಾರ್ಯವನ್ನು ಮುಂದುವರಿಸುವುದಾಗಿ ಭರವಸೆ ನೀಡಿದ್ದಾರೆ. ನೆರೆಯ ದೇಶಕ್ಕೆ ಭಾರತದಿಂದ ಬೃಹತ್ ಪ್ರಮಾಣದ ಪರಿಹಾರ ಸಾಮಗ್ರಿಗಳನ್ನು ಸಾಗಿಸುವುದು ಸರಕು ಸಾಗಣೆ ಹಾಗೂ ಗಡಿ ನಿಯಮಗಳ ದೃಷ್ಟಿಯಿಂದ ಕೊಂಚ ಸವಾಲಿನ ಕೆಲಸವಾಗಿದ್ದರೂ, ಪ್ರವಾಹ ಸಂತ್ರಸ್ತರ ಪುನರ್ವಸತಿಯೇ ತಮ್ಮ ಮೊದಲ ಆದ್ಯತೆಯಾಗಿದೆ ಎಂದು ಸ್ಪಷ್ಟಪಡಿಸಿದ್ದಾರೆ. ಪ್ರಸ್ತುತ ಸೋನು ಸೂದ್ ಅವರ ತಂಡವು ಸ್ಥಳೀಯ ಆಡಳಿತದೊಂದಿಗೆ ಕೈಜೋಡಿಸಿ ಪ್ರತಿಯೊಂದು ಪ್ರವಾಹ ಪೀಡಿತ ಪ್ರದೇಶಗಳ ವಾಸ್ತವ ಅಗತ್ಯತೆಗಳನ್ನು ನಿಖರವಾಗಿ ಅಳೆದು, ನೆರವು ಅತ್ಯಂತ ಅಗತ್ಯವಿರುವ ಪ್ರತಿಯೊಬ್ಬರಿಗೂ ತಲುಪುವಂತೆ ಶ್ರಮಿಸುತ್ತಿದೆ.