ಬೆಂಗಳೂರು, ಅಕ್ಟೋಬರ್ ೨೯, ೨೦೨೬: ಬೆಂಗಳೂರಿನ ಖ್ಯಾತ ಕಸೂತಿ ಕಲಾವಿದೆ ಶ್ರೀಮತಿ ಕವಿತಾ ವೆಂಕಟೇಶ್ ಗೌಡ ಅವರ ನಾಲ್ಕು ದಶಕಗಳ ಕಲಾಸಾಧನೆಯ ಪ್ರತೀಕವಾಗಿರುವ ಅಪರೂಪದ ದಾರ ಕಸೂತಿ ಕಲಾಕೃತಿಗಳ ಪ್ರದರ್ಶನ ’ಗೋಲ್ಡನ್ ಥ್ರೆಡ್ಸ್’ ಇಂದು ನಗರದ ಪ್ರತಿಷ್ಠಿತ ಕರ್ನಾಟಕ ಚಿತ್ರಕಲಾ ಪರಿಷತ್ತಿನಲ್ಲಿ ಉದ್ಘಾಟನೆಗೊಂಡಿತು. ಸಾಂಪ್ರದಾಯಿಕ ಕಲೆಯಾಗಿರುವ ದಾರ ಕಸೂತಿಯಲ್ಲಿ ದೊಡ್ಡ ಗಾತ್ರದ ಫಲಕಗಳ ಮೇಲೆ ನೈಜ ಚಿತ್ರಗಳನ್ನು ಮೂಡಿಸುವ ವಿಶಿಷ್ಟ ಕಲಾಪ್ರಕಾರವನ್ನು ಸಂಪೂರ್ಣವಾಗಿ ಪರಿಚಯಿಸುವ ಪ್ರದರ್ಶನಗಳು ಅಪರೂಪವಾಗಿದ್ದು, ಈ ಪ್ರದರ್ಶನ ವಿಶೇಷ ಗಮನ ಸೆಳೆದಿದೆ.
ಕಳೆದ ೪೦ ವರ್ಷಗಳಲ್ಲಿ ೧ ಲಕ್ಷಕ್ಕೂ ಅಧಿಕ ಗಂಟೆಗಳನ್ನು ಈ ಸೂಕ್ಷ್ಮ ಕಲಾಪ್ರಕಾರದ ಅಭ್ಯಾಸ ಮತ್ತು ಪರಿಪೂರ್ಣತೆಗೆ ಮೀಸಲಿಟ್ಟಿರುವ ಶ್ರೀಮತಿ ಕವಿತಾ ವೆಂಕಟೇಶ್ ಅವರ ಕಲಾಯಾನವು ಆಸಕ್ತಿ, ತಾಳ್ಮೆ ಮತ್ತು ನಿರಂತರ ಪರಿಶ್ರಮದ ಮೂಲಕ ತಮ್ಮ ಕನಸನ್ನು ನನಸಾಗಿಸಿಕೊಳ್ಳಲು ಬಯಸುವವರಿಗೆ ಸ್ಫೂರ್ತಿಯಾಗಿದೆ. ಅವರ ಕಲಾಸಕ್ತಿಗೆ ತಾಯಿ ಶ್ರೀಮತಿ ಜಯಮ್ಮ ಅವರ ಮಾರ್ಗದರ್ಶನವೇ ಆರಂಭಿಕ ಪ್ರೇರಣೆಯಾಗಿದ್ದು, ನಂತರ ಗುರುಗಳಾದ ಶ್ರೀಮತಿ ಶಂಕರಿ ಭಟ್ ಅವರಿಂದ ಔಪಚಾರಿಕ ತರಬೇತಿ ಪಡೆದು ತಮ್ಮ ಕಲಾಪ್ರತಿಭೆಯನ್ನು ಮತ್ತಷ್ಟು ಬೆಳೆಸಿಕೊಂಡರು.
ಗಣ್ಯರ ಉಪಸ್ಥಿತಿಯಲ್ಲಿ ಕಲಾ ಪ್ರದರ್ಶನಕ್ಕೆ ಚಾಲನೆ
ಪ್ರದರ್ಶನದ ಉದ್ಘಾಟನಾ ಸಮಾರಂಭದಲ್ಲಿ ಹಲವು ಗಣ್ಯರು ಉಪಸ್ಥಿತರಿದ್ದರು. ಅವರಲ್ಲಿ ಪ್ರಮುಖರು:
ಡಾ. ಜಯಮಾಲಾ ಖ್ಯಾತ ನಟಿ, ಕರ್ನಾಟಕ ಚಲನಚಿತ್ರ ವಾಣಿಜ್ಯ ಮಂಡಳಿಯ ಅಧ್ಯಕ್ಷೆ ಹಾಗೂ ಕರ್ನಾಟಕ ವಿಧಾನ ಪರಿಷತ್ತಿನ ಮಾಜಿ ಸದಸ್ಯೆ. ಶ್ರೀ ಎನ್. ಮಂಜುನಾಥ್ ಪ್ರಸಾದ್, ಐಎಎಸ್ (ನಿವೃತ್ತ) ಕರ್ನಾಟಕ ಸರ್ಕಾರದ ಮಾಜಿ ಹೆಚ್ಚುವರಿ ಮುಖ್ಯ ಕಾರ್ಯದರ್ಶಿ. ಡಾ. ಸುರೇಶ್ ಕಾಶಿನಾಥ್ ಹವಾರೆ ಪರಮಾಣು ವಿಜ್ಞಾನಿ, ಉದ್ಯಮಿ, ಆಡಳಿತಗಾರ ಹಾಗೂ ಸಮಾಜಸೇವಕರು. ಶ್ರೀ ಎಂ. ಎನ್. ಅನುಚೇತ್, ಐಪಿಎಸ್ ಕರ್ನಾಟಕ ಸರ್ಕಾರದ ವಾರ್ತಾ ಮತ್ತು ಸಾರ್ವಜನಿಕ ಸಂಪರ್ಕ, ಯುವ ಸಬಲೀಕರಣ ಹಾಗೂ ಕ್ರೀಡಾ ಇಲಾಖೆಯ ಆಯುಕ್ತರು.
ಕಲಾವಿದೆಯ ಮಾರ್ಗದರ್ಶಕರಾದ ಡಾ. ಶಿವರಾಮ್, ಕರ್ನಾಟಕ ಚಿತ್ರಕಲಾ ಪರಿಷತ್ತಿನ ಅಧ್ಯಕ್ಷರಾದ ಡಾ. ಬಿ. ಎಲ್. ಶಂಕರ್ ಸೇರಿದಂತೆ ಹಲವು ಪ್ರಮುಖ ಸಾಂಸ್ಕೃತಿಕ ಕ್ಷೇತ್ರದ ಗಣ್ಯರು ಕಾರ್ಯಕ್ರಮದಲ್ಲಿ ಭಾಗವಹಿಸಿದ್ದರು.
ಕಲಾವಿದೆಯ ಸಾಧನೆಗೆ ಡಾ. ಜಯಮಾಲಾ ಮೆಚ್ಚುಗೆ ಕಲಾಕೃತಿಗಳನ್ನು ವೀಕ್ಷಿಸಿ ಮೆಚ್ಚುಗೆ ವ್ಯಕ್ತಪಡಿಸಿದ ಹಿರಿಯ ನಟಿ ಹಾಗೂ ಮಾಜಿ ಸಚಿವೆ ಡಾ. ಜಯಮಾಲಾ ಅವರು ಮಾತನಾಡಿ, “ದಾರ ಕಸೂತಿ ಕಲೆಯ ಬಗ್ಗೆ ನನಗೆ ಯಾವಾಗಲೂ ವಿಶೇಷ ಆಸಕ್ತಿ ಇದೆ. ನಾನೂ ಹವ್ಯಾಸವಾಗಿ ದಾರ ಕಸೂತಿ ಮಾಡುತ್ತೇನೆ. ಆದರೆ ಈ ಮಟ್ಟದ ಕಲಾತ್ಮಕ ಸೃಷ್ಟಿಯನ್ನು ರೂಪಿಸುವುದು ನಿಜಕ್ಕೂ ಅಸಾಧಾರಣ ಸಾಧನೆ. ದಶಕಗಳ ಕಾಲ ಇಂತಹ ಕಲೆಗೆ ಸಮರ್ಪಿಸಿಕೊಂಡು, ಅದನ್ನು ಪೂರ್ಣ ಪ್ರಮಾಣದ ಪ್ರದರ್ಶನದ ರೂಪದಲ್ಲಿ ಜನರ ಮುಂದೆ ತರುವುದು ನನಗೆ ಅಪಾರ ಮೆಚ್ಚುಗೆಯನ್ನು ಮೂಡಿಸಿದೆ. ಈ ವಿಶಿಷ್ಟ ಕಲಾಕೃತಿಗಳನ್ನು ಖುದ್ದಾಗಿ ವೀಕ್ಷಿಸಬೇಕೆಂಬ ಆಸೆಯಿಂದಲೇ ನಾನು ಆಹ್ವಾನವನ್ನು ಸಂತೋಷದಿಂದ ಸ್ವೀಕರಿಸಿದೆ. ಶ್ರೀಮತಿ ಕವಿತಾ ವೆಂಕಟೇಶ್ ಅವರಿಗೆ ನನ್ನ ಹೃತ್ಪೂರ್ವಕ ಶುಭಾಶಯಗಳು. ಅವರ ಕಲೆ ಜಾಗತಿಕ ವೇದಿಕೆಗಳಲ್ಲಿಯೂ ಗುರುತಿಸಿಕೊಳ್ಳಲಿ ಎಂದು ಆಶಿಸುತ್ತೇನೆ,” ಎಂದು ಹೇಳಿದರು.
