ಮುಂಬೈ, ಅ. 15-ದೃಶ್ಯಂ ಚಿತ್ರದ ಖ್ಯಾತಿಯ ನಟಿ ಶ್ರಿಯಾ ಶರಣ್ ತಮ್ಮ ವೃತ್ತಿಜೀವನಕ್ಕೆ ಸಂಬಂಧಿಸಿದಂತೆ ಕೆಲವು ಆಸಕ್ತಿದಾಯಕ ಸಂಗತಿಗಳನ್ನು ಹಂಚಿಕೊಂಡಿದ್ದು, ಸೌತ್ ಸಿನಿಮಾಗಳಲ್ಲಿ ಸ್ಟಾರ್ ನಟಿಯಾಗಿ ಮೆರೆದಿರುವ ಅವರು ಬಾಲಿವುಡ್‍ನಲ್ಲಿ ತಾವು ಎದುರಿಸಿದ ಕಷ್ಟಗಳ ಬಗ್ಗೆ ಮಾತನಾಡಿದ್ದಾರೆ. ಇತ್ತೀಚೆಗೆ ನೀಡಿದ ಸಂದರ್ಶನವೊಂದರಲ್ಲಿ ಅವರು ತಮ್ಮ ಹಳೆಯ ಚಿತ್ರಗಳ ನೆನಪುಗಳನ್ನು ಮೆಲುಕುಹಾಕುತ್ತಾ, 2007ರಲ್ಲಿ ತೆರೆಕಂಡ ತಮ್ಮ ‘ಆವಾರಪನ್’ ಸಿನಿಮಾ ಬಾಕ್ಸ್ ಆಫೀಸ್‍ನಲ್ಲಿ ನಿರೀಕ್ಷಿತ ಯಶಸ್ಸು ಕಾಣದಿದ್ದರೂ ಅದಕ್ಕೆ ಕೆಲವು ವಿಭಾಗಗಳಲ್ಲಿ ನಾಮಿನೇಷನ್‍ಗಳು ಸಿಕ್ಕಿದ್ದವು ಎಂದು ತಿಳಿಸಿದ್ದಾರೆ. ಆದರೆ ಚಿತ್ರಕ್ಕೆ ನಾಮಿನೇಷನ್ ಸಿಕ್ಕರೂ ಸಹ ಆಯೋಜಕರು ತಮ್ಮನ್ನು ಪ್ರಶಸ್ತಿ ಪ್ರದಾನ ಸಮಾರಂಭಕ್ಕೆ ಆಹ್ವಾನಿಸಿರಲಿಲ್ಲ ಎಂದು ಬೇಸರ ವ್ಯಕ್ತಪಡಿಸಿದ್ದಾರೆ. ಸೌತ್ ಇಂಡಸ್ಟ್ರಿಯಲ್ಲಿ ದೊಡ್ಡ ಸೂಪರ್ ಸ್ಟಾರ್ ಆಗಿ ಬೆಳೆದಿರುವ ಶ್ರಿಯಾ ಶರಣ್, ಬಾಲಿವುಡ್ ಇಂಡಸ್ಟ್ರಿಯಲ್ಲಿ ತಕ್ಕ ಮನ್ನಣೆ ಸಿಗದೆ ಆರಂಭದಲ್ಲಿ ಸಾಕಷ್ಟು ಕಷ್ಟಗಳನ್ನು ಹಾಗೂ ಕಡೆಗಣನೆಗಳನ್ನು ಎದುರಿಸಬೇಕಾಯಿತು ಎಂಬುದನ್ನು ಬಹಿರಂಗಪಡಿಸಿದ್ದಾರೆ.
ಇದರ ಜೊತೆಗೆ, ನಿರ್ದೇಶಕ ಎಸ್.ಎಸ್. ರಾಜಮೌಳಿ ಅವರ ಬಹುನಿರೀಕ್ಷಿತ ‘ಆರ್.ಆರ್.ಆರ್’ ಚಿತ್ರದ ಆಡಿಷನ್ ಕರೆ ಬಂದಾಗ ತಮ್ಮ ಸೋದರಸಂಬಂಧಿಯ ಮದುವೆ ಸಮಾರಂಭವನ್ನು ಸಹ ಲೆಕ್ಕಿಸದೆ ಹೋದ ರೋಚಕ ಘಟನೆಯನ್ನು ಅವರು ನೆನಪಿಸಿಕೊಂಡಿದ್ದಾರೆ. ಜೈಪುರದಲ್ಲಿ ತಮ್ಮಸೋದರಸಂಬಂಧಿಯ ಮದುವೆ ಸಂಭ್ರಮದಲ್ಲಿದ್ದಾಗ ರಾಜಮೌಳಿ ತಂಡದಿಂದ ಕರೆ ಬಂದ ಕೂಡಲೇ, ಮದುವೆ ಮೆರವಣಿಗೆಯನ್ನು ಅರ್ಧಕ್ಕೆ ಬಿಟ್ಟು ರಾತ್ರಿಯಿಡೀ ನಿದ್ರೆಸದೆ ಮುಂಜಾನೆ 5 ಗಂಟೆಯ ವಿಮಾನ ಹಿಡಿದು ಹೈದರಾಬಾದ್‍ಗೆ ಆಡಿಷನ್‍ಗಾಗಿ ಓಡಿಹೋಗಿದ್ದಾಗಿ ಅವರು ಹಂಚಿಕೊಂಡಿದ್ದಾರೆ. ಹೀಗೆ ಕೆಲಸದ ಮೇಲಿರುವ ಅವರ ಅಚಲ ಸಮರ್ಪಣಾ ಭಾವ ಮತ್ತು ಕಠಿಣ ಪರಿಶ್ರಮವೇ ಇಂದು ಅವರನ್ನು ದಕ್ಷಿಣ ಭಾರತದ ಜೊತೆಗೆ ದೇಶಾದ್ಯಂತ ಒಬ್ಬ ಯಶಸ್ವಿ ಮತ್ತು ಜನಪ್ರಿಯ ನಟಿಯನ್ನಾಗಿ ಮುಂಚೂಣಿಯಲ್ಲಿರಿಸಿದೆ.