ಬೆಂಗಳೂರು, ಸೆ. ೩: ಬೆಂಗಳೂರಿನ ಆಕಾಶದಲ್ಲಿ ಮತ್ತೊಮ್ಮೆ ಯುದ್ಧವಿಮಾನಗಳ ಭರ್ಜರಿ ಕಸರತ್ತು, ಅತ್ಯಾಧುನಿಕ ವಿಮಾನಗಳ ಹಾರಾಟ ಹಾಗೂ ವೈಮಾನಿಕ ತಂತ್ರಜ್ಞಾನದ ಅದ್ಧೂರಿ ಪ್ರದರ್ಶನಕ್ಕೆ ವೇದಿಕೆ ಸಿದ್ಧವಾಗುತ್ತಿದೆ. ಏಷ್ಯಾದ ಪ್ರಮುಖ ವೈಮಾನಿಕ ಪ್ರದರ್ಶನಗಳಲ್ಲಿ ಒಂದಾದ ಏರೋ ಇಂಡಿಯಾ ೨೦೨೭ರ ದಿನಾಂಕವನ್ನು ಕೇಂದ್ರ ರಕ್ಷಣಾ ಸಚಿವಾಲಯ ಅಧಿಕೃತವಾಗಿ ಪ್ರಕಟಿಸಿದ್ದು, ೨೦೨೭ರ ಫೆಬ್ರವರಿ ೮ರಿಂದ ೧೨ರವರೆಗೆ ಐದು ದಿನಗಳ ಕಾಲ ಯಲಹಂಕ ವಾಯುಪಡೆ ನಿಲ್ದಾಣದಲ್ಲಿ ೧೬ನೇ ಆವೃತ್ತಿಯ ಏರ್ಶೋ ನಡೆಯಲಿದೆ.
ಪ್ರತಿ ಎರಡು ವರ್ಷಕ್ಕೊಮ್ಮೆ ನಡೆಯುವ ಏರೋ ಇಂಡಿಯಾ ಮತ್ತೊಮ್ಮೆ ಬೆಂಗಳೂರಿಗೆ ಮರಳುತ್ತಿರುವುದು ನಗರದ ವೈಮಾನಿಕ ಕ್ಷೇತ್ರದ ಮಹತ್ವವನ್ನು ಮತ್ತಷ್ಟು ಹೆಚ್ಚಿಸಿದೆ. ದೇಶದ ರಕ್ಷಣಾ ಉತ್ಪಾದನೆ, ಏರೋಸ್ಪೇಸ್ ತಂತ್ರಜ್ಞಾನ, ಸ್ವದೇಶಿ ಆವಿಷ್ಕಾರ ಹಾಗೂ ರಕ್ಷಣಾ ರಫ್ತು ಸಾಮರ್ಥ್ಯವನ್ನು ಜಾಗತಿಕ ಮಟ್ಟದಲ್ಲಿ ಪ್ರದರ್ಶಿಸಲು ಈ ಬಾರಿಯ ಪ್ರದರ್ಶನ ಪ್ರಮುಖ ವೇದಿಕೆಯಾಗಲಿದೆ.
ಐದು ದಿನಗಳ ಭರ್ಜರಿ ಪ್ರದರ್ಶನ:
ಫೆ. ೮ರಿಂದ ೧೨ರವರೆಗೆ ನಡೆಯಲಿರುವ ಏರೋ ಇಂಡಿಯಾ ೨೦೨೭ರಲ್ಲಿ ಜಾಗತಿಕ ಏರೋಸ್ಪೇಸ್ ಮತ್ತು ರಕ್ಷಣಾ ಕಂಪನಿಗಳು, ನೀತಿ ನಿರೂಪಕರು, ತಂತ್ರಜ್ಞಾನ ತಜ್ಞರು, ನವೋದ್ಯಮಿಗಳು, ಉದ್ಯಮ ಪ್ರತಿನಿಧಿಗಳು ಹಾಗೂ ರಕ್ಷಣಾ ಪಡೆಗಳ ಸಿಬ್ಬಂದಿ ಪಾಲ್ಗೊಳ್ಳುವ ನಿರೀಕ್ಷೆಯಿದೆ. ವೈಮಾನಿಕ ಉತ್ಪನ್ನಗಳ ಪ್ರದರ್ಶನದ ಜತೆಗೆ ತಂತ್ರಜ್ಞಾನ ಪ್ರದರ್ಶನ, ಉದ್ಯಮ-ಉದ್ಯಮ ಮಾತುಕತೆ, ಸರ್ಕಾರ-ಉದ್ಯಮ ಸಂವಾದ ಹಾಗೂ ವಿವಿಧ ಸಹಭಾಗಿತ್ವದ ಅವಕಾಶಗಳು ಇರಲಿವೆ.
ಇದರ ಪ್ರಮುಖ ಆಕರ್ಷಣೆಯಾಗಿರುವ ವೈಮಾನಿಕ ಪ್ರದರ್ಶನದಲ್ಲೂ ಭಾರತೀಯ ವಾಯುಪಡೆ ಸೇರಿದಂತೆ ವಿವಿಧ ದೇಶಗಳ ಫ್ಲೈಯಿಂಗ್ ತಂಡಗಳು ಭಾಗವಹಿಸುವ ನಿರೀಕ್ಷೆಯಿದೆ. ಅತ್ಯಾಧುನಿಕ ವಿಮಾನಗಳು ಮತ್ತು ವೈಮಾನಿಕ ಸಾಮರ್ಥ್ಯಗಳ ಪ್ರದರ್ಶನ ಪ್ರೇಕ್ಷಕರಿಗೆ ರೋಮಾಂಚನ ಮೂಡಿಸಲಿದೆ.
ರಕ್ಷಣಾ ರಫ್ತಿಗೆ ಒತ್ತು
ಭಾರತವನ್ನು ಜಾಗತಿಕ ರಕ್ಷಣಾ ಉತ್ಪಾದನಾ ಕೇಂದ್ರವನ್ನಾಗಿ ರೂಪಿಸುವ ಪ್ರಯತ್ನದ ಭಾಗವಾಗಿ ಏರೋ ಇಂಡಿಯಾ ೨೦೨೭ಕ್ಕೆ ವಿಶೇಷ ಮಹತ್ವ ನೀಡಲಾಗಿದೆ. ‘ಆತ್ಮನಿರ್ಭರ ಭಾರತ’ದ ಆಶಯಕ್ಕೆ ಪೂರಕವಾಗಿ ದೇಶೀಯ ರಕ್ಷಣಾ ಕೈಗಾರಿಕೆಗಳು, ಎಂಎಸ್ಎಂಇಗಳು ಮತ್ತು ಸ್ಟಾರ್ಟ್ಅಪ್ಗಳಿಗೆ ಜಾಗತಿಕ ಕಂಪನಿಗಳೊಂದಿಗೆ ಸಂಪರ್ಕ ಸಾಧಿಸಲು ಇದು ಅವಕಾಶ ಕಲ್ಪಿಸಲಿದೆ. ರಕ್ಷಣಾ ಉತ್ಪನ್ನಗಳ ರಫ್ತು, ಹೂಡಿಕೆ, ತಂತ್ರಜ್ಞಾನ ಸಹಕಾರ ಮತ್ತು ಜಾಗತಿಕ ಪೂರೈಕೆ ಸರಪಳಿಯಲ್ಲಿ ಭಾರತದ ಪಾಲುದಾರಿಕೆಯನ್ನು ಹೆಚ್ಚಿಸುವ ಉದ್ದೇಶವೂ ಇದೆ.
ಸೆ. ೩ರಿಂದ ನೋಂದಣಿ:
ಏರೋ ಇಂಡಿಯಾ ೨೦೨೭ರ ಪ್ರದರ್ಶನದಲ್ಲಿ ಭಾಗವಹಿಸಲು ಆನ್ಲೈನ್ ನೋಂದಣಿ ಹಾಗೂ ಪ್ರದರ್ಶನ ಸ್ಥಳ ಕಾಯ್ದಿರಿಸುವ ಪ್ರಕ್ರಿಯೆ ಸೆಪ್ಟೆಂಬರ್ ೩, ೨೦೨೬ರಿಂದ ಆರಂಭವಾಗಲಿದೆ. ಇದಕ್ಕಾಗಿ ಪ್ರತ್ಯೇಕ ವೆಬ್ ಪೋರ್ಟಲ್ ಸಿದ್ಧಪಡಿಸಲಾಗಿದೆ ಎಂದು ರಕ್ಷಣಾ ಸಚಿವಾಲಯ ತಿಳಿಸಿದೆ.
ಯಲಹಂಕ ವಾಯುನೆಲೆಯಲ್ಲಿ ಈಗಾಗಲೇ ಹಲವು ಆವೃತ್ತಿಗಳ ಏರೋ ಇಂಡಿಯಾ ಯಶಸ್ವಿಯಾಗಿ ನಡೆದಿದ್ದು, ೨೦೨೭ರ ಆವೃತ್ತಿಯ ಸಿದ್ಧತೆಗಳೂ ಆರಂಭವಾಗಿವೆ. ರಕ್ಷಣಾ ಸಚಿವಾಲಯದ ರಕ್ಷಣಾ ಉತ್ಪಾದನಾ ಇಲಾಖೆಯ ಪರವಾಗಿ ಹಿಂದೂಸ್ತಾನ್ ಏರೋನಾಟಿಕ್ಸ್ ಲಿಮಿಟೆಡ್ (ಊಂಐ) ಪ್ರಮುಖ ನೋಡಲ್ ಏಜೆನ್ಸಿಯಾಗಿ ಕಾರ್ಯನಿರ್ವಹಿಸಲಿದೆ.
ಏರೋ ಇಂಡಿಯಾ ೨೦೨೭
ದಿನಾಂಕ: ಫೆ. ೮?೧೨, ೨೦೨೭
ಸ್ಥಳ: ಏರ್ ಫೋರ್ಸ್ ಸ್ಟೇಷನ್, ಯಲಹಂಕ
ಆವೃತ್ತಿ: ೧೬ನೇ
ಅವಧಿ: ಐದು ದಿನ
ಆಯೋಜಕರು: ರಕ್ಷಣಾ ಉತ್ಪಾದನಾ ಇಲಾಖೆ, ರಕ್ಷಣಾ ಸಚಿವಾಲಯ
ನೋಂದಣಿ: ಸೆ. ೩, ೨೦೨೬ರಿಂದ ಆನ್ಲೈನ್
ನೋಡಲ್ ಏಜೆನ್ಸಿ: ಊಂಐ
ಮುಖ್ಯ ಉದ್ದೇಶ: ಏರೋಸ್ಪೇಸ್, ರಕ್ಷಣಾ ಉತ್ಪಾದನೆ, ತಂತ್ರಜ್ಞಾನ ಮತ್ತು ರಫ್ತು ಸಾಮರ್ಥ್ಯದ ಪ್ರದರ್ಶನ.
