ಉಜ್ಜಯಿನಿ (ಮಧ್ಯಪ್ರದೇಶ),ಮೇ.೧೨-ಖ್ಯಾತ ಟಾಲಿವುಡ್ ಮತ್ತು ಬಾಲಿವುಡ್ ನಟಿ ತಮನ್ನಾ ಭಾಟಿಯಾ ಮಂಗಳವಾರ ಬೆಳಿಗ್ಗೆ ವಿಶ್ವಪ್ರಸಿದ್ಧ ಉಜ್ಜಯಿನಿಯ ಮಹಾಕಾಳೇಶ್ವರ ದೇವಸ್ಥಾನಕ್ಕೆ ಭೇಟಿ ನೀಡಿ ಮಹಾಕಾಳೇಶ್ವರನಿಗೆ ನಮಿಸಿ ಆಶೀರ್ವಾದ ಪಡೆದು ದೇವಾಲಯದ ಭಸ್ಮಾರತಿಯಲ್ಲಿ ಭಾಗವಹಿಸಿದ್ದರು. ಅವರ ಆಪ್ತ ಸ್ನೇಹಿತೆ ಮತ್ತು ನಿರ್ಮಾಪಕಿ ಪ್ರಜ್ಞಾ ಕಪೂರ್ ನಟಿಯೊಂದಿಗೆ ಇದ್ದರು.
ಭಸ್ಮಾರತಿ ಸಮಯದಲ್ಲಿ ನಟಿ ಸುಮಾರು ಎರಡು ಗಂಟೆಗಳ ಕಾಲ ಭಕ್ತಿಯಿಂದ ಕುಳಿತಿದ್ದರು. ಆರತಿಯ ನಂತರ, ಅವರು ಪೂಜೆ ಸಲ್ಲಿಸಿ ದೇವರ ಆಶೀರ್ವಾದವನ್ನು ಪಡೆದಿದ್ದಾರೆ.
ದರ್ಶನದ ನಂತರ ಮಾಧ್ಯಮ ಗಳೊಂದಿಗೆ ಮಾತನಾಡಿದ ತಮನ್ನಾ ಭಾಟಿಯಾ ಭಾವುಕರಾಗಿ ಕಾಣಿಸಿಕೊಂಡರು. “ಬಾಬಾ ಮಹಾಕಾಲ್ ಕರೆಯದ ಹೊರತು ಯಾರೂ ಇಲ್ಲಿಗೆ ದರ್ಶನಕ್ಕೆ ಬರಲು ಸಾಧ್ಯವಿಲ್ಲ.
ಸುಮಾರು ಎರಡು ಗಂಟೆಗಳ ಕಾಲ ನಡೆಯುವ ಈ ಭವ್ಯ ಆರತಿಯನ್ನು ಅನುಭವಿಸಬಹುದಾದ ಇಡೀ ದೇಶದಲ್ಲಿ ಇದೊಂದೇ ದೇವಾಲಯ ಇದಾಗಿದೆ. ಈ ದೈವಿಕ ಭಾವನೆಯನ್ನು ಪದಗಳಲ್ಲಿ ವರ್ಣಿಸಲು ಸಾಧ್ಯವಿಲ್ಲ ಎಂದು ಅವರು ಹೇಳಿದ್ದಾರೆ.ಭಸ್ಮ ಆರತಿ ಮುಗಿದ ನಂತರ, ತಮನ್ನಾ ಭಾಟಿಯಾ ಬೆಳ್ಳಿ ದ್ವಾರದ ಮೂಲಕ ಬಾಬಾ ಮಹಾಕಾಲ್ ಅವರನ್ನು ಪೂಜಿಸಿ ಜಲಭಿಷೇಕ ಮಾಡಿದ್ದಾರೆ. ನಂತರ ಅವರು ನಂದಿ ಹಾಲ್ಗೆ ತೆರಳಿ ನಂದಿ ದೇವರನ್ನು ಪೂಜಿಸಿದರು ಮತ್ತು ಧಾರ್ಮಿಕ ಸಂಪ್ರದಾಯಗಳನ್ನು ಅನುಸರಿಸಿ,ನಂದಿ ಕಿವಿಯಲ್ಲಿ ತಮ್ಮ ಆಸೆ-ಆಕಾಂಕ್ಷೆ ಪಿಸುಗುಟ್ಟಿದ್ದಾರೆ.
ದೇವರಲ್ಲಿ ಏನನ್ನೂ ಕೇಳಲಿಲ್ಲ ಬದಲಾಗಿ ದೇವರಿಗೆ ಧನ್ಯವಾದ ಹೇಳಲು ಇಲ್ಲಿಗೆ ಬಂದಿದ್ದೇನೆ ಎಂದು ತಮನ್ನಾ ಹೇಳಿದ್ದಾರೆ.ಬಾಬಾ ಮಹಾಕಾಲ್ ನನಗೆ ಎಲ್ಲವನ್ನೂ ನೀಡಿದ್ದಾರೆ. ಇಲ್ಲಿನ ಶಕ್ತಿ ಅದ್ಭುತವಾಗಿದೆ.
ಕೆಲವೇ ದೇವಾಲಯಗಳು ಮಾತ್ರ ಇಷ್ಟೊಂದು ಶಾಂತಿಯುತವಾಗಿ ಕುಳಿತು ದೇವರ ಭಕ್ತಿಯಲ್ಲಿ ಮುಳುಗಲು ಅವಕಾಶ ನೀಡುತ್ತವೆ. ಈ ಉತ್ಸಾಹಭರಿತ ವಾತಾವರಣವನ್ನು ಅನುಭವಿಸಲು ಅವಕಾಶ ಸಿಕ್ಕಿದ್ದು ನನ್ನ ಅದೃಷ್ಟ ಎಂದು ನಾನು ಭಾವಿಸುತ್ತೇನೆ” ಎಂದು ಅವರು ವಿವರಿಸಿದ್ದಾರೆ.
ಮಹಾಕಾಳೇಶ್ವರ ದೇವಾಲಯ ನಿರ್ವಹಣಾ ಸಮಿತಿಯ ಪರವಾಗಿ ಎಂಜಿನಿಯರ್ ಶಿವಕಾಂತ್ ಪಾಂಡೆ ಅವರು ನಟಿಯನ್ನು ಸ್ವಾಗತಿಸಿ ಸನ್ಮಾನಿಸಿದ್ದಾರೆ.