ಯಾದಗಿರಿ: ಏ.೧೫:ವಡಗೇರ ತಾಲೂಕಿನ ಹಯ್ಯಾಳ ಕೆ ಗ್ರಾಮದಲ್ಲಿ ಭಾರತದ ಸಂವಿಧಾನ ಶಿಲ್ಪಿ, ವಿಶ್ವಮಾನವತೆಯ ಪ್ರೇರಣಾಸ್ತಂಭ, ಬೋಧಿಸತ್ವ ಡಾ. ಬಾಬಾಸಾಹೇಬ್ ಅಂಬೇಡ್ಕರ್ ಅವರ ೧೩೫ನೇ ಜಯಂತಿಯನ್ನು ಗ್ರಾಮಸ್ಥರು ಅಪಾರ ಭಕ್ತಿಭಾವ, ಗೌರವ ಹಾಗೂ ಸಾಮರಸ್ಯದ ಸಂಕೇತವಾಗಿ ಭಾವಪೂರ್ಣವಾಗಿ ಆಚರಿಸಿದರು.
ಗ್ರಾಮದ ವಿವಿಧ ಸಮುದಾಯಗಳ ಮುಖಂಡರು, ಯುವಕರು ಹಾಗೂ ಹಿರಿಯರು ಒಂದೇ ವೇದಿಕೆಯಲ್ಲಿ ಸೇರಿ ಡಾ. ಅಂಬೇಡ್ಕರ್ ಅವರ ಭಾವಚಿತ್ರಕ್ಕೆ ಪೂಜೆ ಸಲ್ಲಿಸಿ, ಅವರ ಸಮಾನತೆ, ನ್ಯಾಯ ಮತ್ತು ಮಾನವ ಹಕ್ಕುಗಳ ಸಂದೇಶವನ್ನು ಸ್ಮರಿಸಿದರು. ಕಾರ್ಯಕ್ರಮದಲ್ಲಿ ಸಾಮಾಜಿಕ ಏಕತೆಯ ಪ್ರತೀಕವಾಗಿ ಎಲ್ಲ ವರ್ಗದ ಜನರು ಭಾಗವಹಿಸಿದ್ದು, ಗ್ರಾಮದಲ್ಲಿ ಹಬ್ಬದ ಸಂಭ್ರಮ ಮೂಡಿಸಿತು.
ಈ ಸಂದರ್ಭದಲ್ಲಿ ಮಾತನಾಡಿದ ಮುಖಂಡರು, ಡಾ. ಅಂಬೇಡ್ಕರ್ ಅವರು ಕೇವಲ ವ್ಯಕ್ತಿಯಲ್ಲ, ಒಂದು ಚಿಂತನೆ, ಒಂದು ಚಳವಳಿ ಹಾಗೂ ಶೋಷಿತರ ಧ್ವನಿಯಾಗಿ ಸದಾ ಜೀವಂತವಾಗಿರುವ ಮಹಾನ್ ದಾರ್ಶನಿಕ ಎಂದು ಕೊಂಡಾಡಿದರು. ಅವರ ತತ್ವಗಳು ಇಂದಿನ ಯುವಜನತೆಗೆ ಮಾರ್ಗದರ್ಶಕವಾಗಿದ್ದು, ಶಿಕ್ಷಣ ಮತ್ತು ಹಕ್ಕುಗಳ ಅರಿವು ಮೂಲಕ ಸಮಾಜವನ್ನು ಸಮತೋಲನದ ದಾರಿಯಲ್ಲಿ ಮುನ್ನಡೆಸಬೇಕೆಂದು ಕರೆ ನೀಡಿದರು.
ಕಾರ್ಯಕ್ರಮದಲ್ಲಿ ಸೂಗಯ್ಯ ಸ್ವಾಮಿ, ಮಲ್ಲಣ್ಣಗೌಡ ಬಿರೆದಾರ, ಬಂಡೇಶಗೌಡ ಬಿರೆದಾರ, ಭೀಮನಗೌಡ ಮಳಿಗಿ, ಭೀಮಣ್ಣಗೌಡ ಚ. ಬಿರೆದಾರ, ಅಯ್ಯಣ್ಣಗೌಡ ಮಾನಪ್ಪ ಭಂಡಾರಿ, ಮಹಾದೇಶಗೌಡ ಬಿರೆದಾರ, ದೇವಣ್ಣ ಬಿರೆದಾರ, ಭೀಮಣ್ಣ ಸೂಗೂರ, ರವಿ ಸಾಹುಕಾರ, ಬಸವರಾಜ ಬಿರೆದಾರ, ಹಣಮಂತ ದೊರೆ, ನಿಂಗಪ್ಪ ಹುಂಡೆಕಲ್, ಫಕೀರಪ್ಪ ಕವಲಿ, ರತ್ನಪ್ಪ ಕವಲಿ, ಹಣಮಂತ್ರಾಯ ಕವಲಿ, ಲಾಳೇಸಾಬ ಕಂಬಾರ, ಗಿರೇಶ್ ಭಂಡಾರಿ, ರಾಯಪ್ಪ ಭಂಡಾರಿ, ಅಯ್ಯಪ್ಪ ಭಂಡಾರಿ, ಸಾಬಣ್ಣ ಬೋಳಾರಿ, ಮರೆಪ್ಪ ಪೋಲೀಸ್, ಭೀಮರಾಯ ಗಡ್ಡೆಸೂಗರ, ಮಲ್ಲಪ್ಪ ಮೆಟಗಿ ಸೇರಿದಂತೆ ಅನೇಕ ಗಣ್ಯರು ಹಾಗೂ ಗ್ರಾಮಸ್ಥರು ಉಪಸ್ಥಿತರಿದ್ದರು.
ಒಟ್ಟಾರೆ, ಈ ಜಯಂತಿ ಆಚರಣೆ ಗ್ರಾಮದಲ್ಲಿ ಸೌಹಾರ್ದತೆ, ಸಮಾನತೆ ಮತ್ತು ಸಾಮಾಜಿಕ ಬಾಂಧವ್ಯದ ಮೌಲ್ಯಗಳನ್ನು ಮತ್ತಷ್ಟು ಬಲಪಡಿಸಿದ ಮಹತ್ವದ ಕ್ಷಣವಾಗಿ ಗುರುತಿಸಲಾಯಿತು.