ವಾಷಿಂಗ್ಟನ್ ,ಸೆ.೨-ಅಮೆರಿಕದ ಮಾಜಿ ರಾಷ್ಟ್ರೀಯ ಭದ್ರತಾ ಸಲಹೆಗಾರ (ಎನ್‌ಎಸ್‌ಎ) ಜೇಕ್ ಸುಲ್ಲಿವನ್ ಡೊನಾಲ್ಡ್ ಟ್ರಂಪ್ ವಿರುದ್ಧ ಆಘಾತಕಾರಿ ಆರೋಪ ಮಾಡಿದ್ದಾರೆ. ಟ್ರಂಪ್ ತಮ್ಮ ಕುಟುಂಬ ವ್ಯವಹಾರ ಹಿತಾಸಕ್ತಿಗಳಿಗಾಗಿ ದಶಕಗಳಷ್ಟು ಹಳೆಯದಾದ ಭಾರತ-ಅಮೆರಿಕ ಸಂಬಂಧವನ್ನು ಪಣಕ್ಕಿಟ್ಟಿದ್ದಾರೆ ಎಂದು ಅವರು ಆರೋಪಿಸಿದ್ದಾರೆ. ಪಾಕಿಸ್ತಾನದೊಂದಿಗಿನ ಟ್ರಂಪ್ ಅವರ ವ್ಯವಹಾರ ಒಪ್ಪಂದಗಳಿಂದಾಗಿ, ಭಾರತದಂತಹ ದೊಡ್ಡ ಪ್ರಜಾಪ್ರಭುತ್ವ ಪಾಲುದಾರರೊಂದಿಗಿನ ಅಮೆರಿಕದ ಸಂಬಂಧ ದುರ್ಬಲಗೊಳ್ಳುತ್ತಿದೆ ಎಂದು ಸುಲ್ಲಿವನ್ ಸ್ಪಷ್ಟವಾಗಿ ಹೇಳಿದ್ದಾರೆ. ಇದು ಕೇವಲ ರಾಜತಾಂತ್ರಿಕ ಹಿನ್ನಡೆಯಲ್ಲ, ಬದಲಾಗಿ ಅಮೆರಿಕದ ಅಂತರರಾಷ್ಟ್ರೀಯ ಇಮೇಜ್‌ಗೆ ಎಚ್ಚರಿಕೆ ಗಂಟೆಯಾಗಿದೆ ಎಂದಿದ್ದಾರೆ.
ಪಾಕಿಸ್ತಾನದೊಂದಿಗಿನ ವ್ಯವಹಾರ ಒಪ್ಪಂದಗಳಿಗಾಗಿ ಡೊನಾಲ್ಡ್ ಟ್ರಂಪ್ ಭಾರತ-ಅಮೆರಿಕ ಸಂಬಂಧಗಳಿಗೆ ಹಾನಿ ಮಾಡುತ್ತಿದ್ದಾರೆ ಎಂದು ಮಾಜಿ ಎನ್‌ಎಸ್‌ಎ ಜೇಕ್ ಸುಲ್ಲಿವನ್ ಆರೋಪಿಸಿದ್ದು. ಪಾಕಿಸ್ತಾನದಲ್ಲಿ ಟ್ರಂಪ್ ಕುಟುಂಬದ ಒಪ್ಪಂದಗಳಿಂದಾಗಿ ಅಮೆರಿಕದ ವಿಶ್ವಾಸಾರ್ಹತೆಯೂ ಪ್ರಶ್ನಾರ್ಹವಾಗಿದೆ ಸ್ಪೋಟಕ ಮಾಹಿತಿ ಬಹಿರಂಗ ಪಡಿಸಿದ್ದಾರೆ.
ಭಾರತ-ಅಮೆರಿಕ ಸಂಬಂಧಗಳು ರಾತ್ರೋರಾತ್ರಿ ಯಶಸ್ಸು ಕಂಡಿಲ್ಲ ಎಂದು ಸುಲ್ಲಿವನ್ ನೆನಪಿಸಿಕೊಂಡಿದ್ದಾರೆ. ತಂತ್ರಜ್ಞಾನ, ಆರ್ಥಿಕತೆ ಮತ್ತು ಭದ್ರತೆಯಂತಹ ಪ್ರಮುಖ ಕ್ಷೇತ್ರಗಳಲ್ಲಿ ಬಲವಾದ ಪಾಲುದಾರಿಕೆಯನ್ನು ನಿರ್ಮಿಸಲು ಎರಡೂ ದೇಶಗಳು ವರ್ಷಗಳ ಕಾಲ ಶ್ರಮಿಸಿವೆ. ಈ ಸಂಬಂಧವು ಎರಡೂ ದೇಶಗಳಿಗೆ ಮಾತ್ರವಲ್ಲದೆ ಇಡೀ ಏಷ್ಯಾ-ಪೆಸಿಫಿಕ್ ಪ್ರದೇಶಕ್ಕೆ ಕಾರ್ಯತಂತ್ರದ ಸ್ಥಿರತೆಯನ್ನು ನೀಡಿದೆ. ಆದರೆ ಸುಲ್ಲಿವನ್ ಪ್ರಕಾರ, ಟ್ರಂಪ್ ತಮ್ಮ ವೈಯಕ್ತಿಕ ವ್ಯವಹಾರ ಲಾಭಕ್ಕಾಗಿ ಈ ಸಂಬಂಧದ ಮಹತ್ವವನ್ನು ಬದಿಗಿಟ್ಟರು, ಇದು ಅಮೆರಿಕದ ದೀರ್ಘಕಾಲೀನ ನೀತಿಗೆ ವಿರುದ್ಧವಾಗಿದೆ ಎಂದಿದ್ದಾರೆ.
ಪಾಕಿಸ್ತಾನದೊಂದಿಗೆ ಕ್ರಿಪ್ಟೋ ವ್ಯವಹಾರಗಳ ಸಂಪರ್ಕ
ಟ್ರಂಪ್ ಅವರ ಪಾಕಿಸ್ತಾನ ಸಂಪರ್ಕದ ವಿವರಗಳನ್ನು ಸುಲ್ಲಿವನ್ ಸಹ ಹಂಚಿಕೊಂಡರು. ಏಪ್ರಿಲ್ ೨೦೨೪ ರಲ್ಲಿ, ಟ್ರಂಪ್ ಬೆಂಬಲಿತ ಕ್ರಿಪ್ಟೋಕರೆನ್ಸಿ ಪ್ಲಾಟ್‌ಫಾರ್ಮ್ ವರ್ಲ್ಡ್ ಲಿಬರ್ಟಿ ಫೈನಾನ್ಷಿಯಲ್ (ಡಬ್ಲ್ಯೂಎಲ್‌ಎಫ್) ಪಾಕಿಸ್ತಾನ ಕ್ರಿಪ್ಟೋ ಕೌನ್ಸಿಲ್ (ಪಿಸಿಸಿ) ನೊಂದಿಗೆ ಹಲವಾರು ಪ್ರಮುಖ ಒಪ್ಪಂದಗಳಿಗೆ ಸಹಿ ಹಾಕಿದೆ. ಈ ಒಪ್ಪಂದವು ಹೂಡಿಕೆ ಮತ್ತು ನಾವೀನ್ಯತೆಯನ್ನು ಉತ್ತೇಜಿಸುವ ಬಗ್ಗೆ ಮಾತನಾಡಿದೆ ಮತ್ತು ಟ್ರಂಪ್ ಮತ್ತು ಅವರ ಸಹಚರರು ಡಬ್ಲ್ಯೂಎಲ್‌ಎಫ್ ನಲ್ಲಿ ೬೦% ಪಾಲನ್ನು ಹೊಂದಿದ್ದಾರೆಂದು ಹೇಳಲಾಗುತ್ತದೆ. ಇದಷ್ಟೇ ಅಲ್ಲ, ಟ್ರಂಪ್ ಅವರ ಆಪ್ತ ಸಹಾಯಕ ಸ್ಟೀವ್ ವಿಟ್ಕಾಫ್ ಅವರ ಪುತ್ರ ಜಕಾರಿ ವಿಟ್ಕಾಫ್ ಕೂಡ ಈ ಒಪ್ಪಂದಕ್ಕಾಗಿ ಪಾಕಿಸ್ತಾನಕ್ಕೆ ಹೋಗಿದ್ದು ಈ ಸಂಪರ್ಕವು ಸಾರ್ವಜನಿಕವಾದ ನಂತರ, ಪಾಕಿಸ್ತಾನದೊಂದಿಗಿನ ಈ ನಿಕಟತೆಗೆ ಭಾರತ ಏಕೆ ಬೆಲೆ ತೆರಬೇಕಾಗಿದೆ ಎಂಬ ಪ್ರಶ್ನೆ ಉದ್ಭವಿಸುವುದು ಸಹಜ.