ಮಾರ್ಚ್ 6 ರಂದು ಬಿಡುಗಡೆ
ಶೀರ್ಷಿಕೆಯಿಂದಲೇ ಸಿನಿಪ್ರೇಕ್ಷಕರಲ್ಲಿ ಕುತೂಹಲ ಹುಟ್ಟಿಸಿರುವ ಹೊಸತಂಡದ ವಿಭಿನ್ನ ಪ್ರಯತ್ನ ‘ಗಾರ್ಜಿಯಸ್ ರಾಸ್ಕಲ್’ ಇದೀಗ ತೆರೆಗೆ ಬರಲು ಸಜ್ಜಾಗಿದೆ. ಡಾರ್ಕ್ ಕಾಮಿಡಿ ಹಂದರ, ತಾಜಾ ಕಥಾ ಹೇಳಿಕೆ ಮತ್ತು ಮನರಂಜನೆಯ ಹೊಸ ಮಿಶ್ರಣದೊಂದಿಗೆ ಈ ಚಿತ್ರ ಮಾರ್ಚ್ 6ರಂದು ಬಿಡುಗಡೆಯಾಗುತ್ತಿದೆ.
ಅದೃಷ್ಟಲಕ್ಷ್ಮೀ ಪ್ರೊಡಕ್ಷನ್ಸ್ ಲಾಂಛನದಲ್ಲಿ ಆರ್ ಚೇತನ್ ಕೃಷ್ಣ ಈ ಚಿತ್ರವನ್ನು ನಿರ್ಮಿಸಿ, ಸಂಗೀತವನ್ನೂ ನೀಡಿದ್ದಾರೆ. ಚಿತ್ರದಲ್ಲಿನ ಎರಡು ಹಾಡುಗಳು ಈಗಾಗಲೇ ಬಿಡುಗಡೆಯಾಗಿ ಉತ್ತಮ ಪ್ರತಿಕ್ರಿಯೆ ಪಡೆದುಕೊಂಡಿವೆ. ತಮಿಳಿನ ಖ್ಯಾತ ಗಾಯಕ ವೇಲುಮುರುಗನ್ ಹಾಗೂ ‘ಸರಿಗಮಪ’ ಖ್ಯಾತಿಯ ದರ್ಶನ್ ನಾರಾಯಣ್ ಹಾಡಿರುವ ಈ ಹಾಡುಗಳಿಗೆ ಕೇಳುಗರು ಫಿದಾ ಆಗಿದ್ದಾರೆ.
ಕಥೆ, ಚಿತ್ರಕಥೆ ಬರೆದು ನಿರ್ದೇಶಿಸಿರುವ ಪ್ರಮೋದ್ ಜೋಯಿಸ್ ಈ ಚಿತ್ರದಲ್ಲಿ ವಿಭಿನ್ನ ಮನರಂಜನೆ ನೀಡುವ ಪ್ರಯತ್ನ ಮಾಡಿದ್ದಾರೆ. ಶಂಕು ಅವರ ಛಾಯಾಗ್ರಹಣ, ಅಕ್ಷಯ್ ಪಿ ರಾವ್ ಸಂಕಲನ, ‘ಕೆ.ಜಿ.ಎಫ್’ ಖ್ಯಾತಿಯ ನಂದು ಶಬ್ದ ವಿನ್ಯಾಸ, ಶ್ರೀನಿವಾಸ್ ಬೆಟ್ಟದಪುರ ಸಹ ನಿರ್ಮಾಣ ಹಾಗೂ ಚರಣ್ ಸುವರ್ಣ ಕ್ರಿಯೇಟಿವ್ ಹೆಡ್ ಆಗಿ ಕೆಲಸ ಮಾಡಿದ್ದಾರೆ.
ಪ್ರೇರಣಾ ಭಟ್, ಯುವಿನ್, ರಾಜವೀರ್ ಸಿಂಗ್, ಚೇತನ್ ಮಹೇಶ್, ಶಕ್ತಿಕುಮಾರ್, ಸುನೀಲ್ ಪುರಾಣಿಕ್, ಸ್ವಾತಿ ಸೇರಿದಂತೆ ಹೊಸ ಮುಖಗಳ ತಾರಾಬಳಗ ಈ ಚಿತ್ರದ ವಿಶೇಷ. ಬೆಂಗಳೂರು ಮತ್ತು ಮಹಾರಾಷ್ಟ್ರದ ವಿವಿಧ ಸ್ಥಳಗಳಲ್ಲಿ ಚಿತ್ರೀಕರಣಗೊಂಡಿರುವ ಈ ಸಿನಿಮಾ, ಡಾರ್ಕ್ ಕಾಮಿಡಿಯ ಜೊತೆಗೆ ಪ್ರೇಕ್ಷಕರಿಗೆ ಬೇಕಾದ ಎಲ್ಲಾ ಅಂಶಗಳನ್ನು ಒಳಗೊಂಡಿದೆ.
“ಇದು ನನ್ನ ಮೊದಲ ನಿರ್ಮಾಣ. ಶೀರ್ಷಿಕೆಯಿಂದಲೇ ಗಮನ ಸೆಳೆದಿರುವ ಈ ಚಿತ್ರಕ್ಕೆ ಪ್ರೇಕ್ಷಕರ ಪ್ರೋತ್ಸಾಹ ಅಗತ್ಯ” ಎಂದು ಚೇತನ್ ಕೃಷ್ಣ ತಿಳಿಸಿದ್ದಾರೆ.ಹೊಸತಂಡದ ಹೊಸ ಅಬ್ಬರ ‘ಗಾರ್ಜಿಯಸ್ ರಾಸ್ಕಲ್’—ಮನರಂಜನೆಯ ವಿಭಿನ್ನ ರುಚಿ ನೀಡಲು ಸಜ್ಜಾಗಿದೆ.