ನ್ಯೂಯಾರ್ಕ್,ಜೂ.29- ನ್ಯೂಯಾರ್ಕ್‍ನ ಮ್ಯಾನ್‍ಹ್ಯಾಟನ್‍ನಲ್ಲಿ ಬದಲಾಗುತ್ತಿರುವ ಆಹಾರ ಅಭಿರುಚಿಗಳ ನಡುವೆ, ಭಾರತೀಯ ಮೂಲದ ಮೂಲತಃ ತಮಿಳುನಾಡಿನ ಬಾಣಸಿಗ ವಿಜಯ್ ಕುಮಾರ್ ಸದ್ದಿಲ್ಲದೆ ಒಂದು ಕ್ರಾಂತಿಯನ್ನು ಹುಟ್ಟುಹಾಕಿದ್ದಾರೆ.
ಅಮೆರಿಕದ ಆಹಾರ ಉದ್ಯಮದ ಅತ್ಯುನ್ನತ ಗೌರವಗಳಲ್ಲಿ ಒಂದಾದ ಜೇಮ್ಸ್ ಬಿಯರ್ಡ್ ಪ್ರಶಸ್ತಿಗಳನ್ನು ಬಾಣಸಿಗರು ಮತ್ತು ರೆಸ್ಟೋರೆಂಟ್‍ಗಳಿಗೆ ಪ್ರದಾನ ಮಾಡಲಾಗಿದೆ. ಮೊದಲ ಬಾರಿಗೆ ಭಾರತೀಯ ರೆಸ್ಟೋರೆಂಟ್ ಅಗ್ರ ಸ್ಥಾನವನ್ನು ಪಡೆದುಕೊಂಡಿದೆ. ದಕ್ಷಿಣ ಭಾರತೀಯ ಪಾಕಪದ್ಧತಿಯನ್ನು ಪೂರೈಸುವ ಗ್ರೀನ್‍ವಿಚ್ ವಿಲೇಜ್ ಹಾಟ್‍ಸ್ಪಾಟ್‍ನ ಸೆಮ್ಮಾದ ವಿಜಯ್ ಕುಮಾರ್ ಅವರನ್ನು ಆಹಾರ ಜಗತ್ತಿನ ಆಸ್ಕರ್ ಎಂದು ಕರೆಯಲ್ಪಡುವ ಜೇಮ್ಸ್ ಬಿಯರ್ಡ್ ಫೌಂಡೇಶನ್ ನ್ಯೂಯಾರ್ಕ್‍ನ ಅತ್ಯುತ್ತಮ ಬಾಣಸಿಗ ಎಂದು ಹೆಸರಿಸಿದೆ. ಪಾಕಶಾಲೆಯ ಕಲೆಗಳು, ಆತಿಥ್ಯ, ಮಾಧ್ಯಮ ಮತ್ತು ವಿಶಾಲ ಆಹಾರ ವ್ಯವಸ್ಥೆಯಲ್ಲಿ ಅಸಾಧಾರಣ ಪ್ರತಿಭೆ ಮತ್ತು ಸಾಧನೆಯನ್ನು ಗುರುತಿಸುವ ಜೇಮ್ಸ್ ಬಿಯರ್ಡ್ ಪ್ರಶಸ್ತಿಗೆ ಅವರು ನಾಮನಿರ್ದೇಶನಗೊಂಡಿದ್ದು ಮತ್ತು ಗೆದ್ದಿರುವುದು ಇದೇ ಮೊದಲು.
ವಿಜಯ್ ಕುಮಾರ್ ಅವರಿಗೆ ನ್ಯೂಯಾರ್ಕ್ ರಾಜ್ಯದಲ್ಲಿ ಅತ್ಯುತ್ತಮ ಬಾಣಸಿಗರಿಗೆ ನೀಡುವ ಜೇಮ್ಸ್ ಬಿಯರ್ಡ್ ಪ್ರಶಸ್ತಿಯನ್ನು ನೀಡಿ ಗೌರವಿಸಲಾಗಿದೆ. ಈ ಪ್ರಶಸ್ತಿಯನ್ನು ವೈಯಕ್ತಿಕ ಮನ್ನಣೆ ಮಾತ್ರವಲ್ಲದೆ ಸಾಂಸ್ಕೃತಿಕ ತಿರುವು ಎಂದೂ ಪರಿಗಣಿಸಲಾಗಿದೆ.
ಈ ಗೆಲುವು ಅವರ ವೈಯಕ್ತಿಕ ಜೀವನದಲ್ಲಿ ಒಂದು ಮೈಲಿಗಲ್ಲು, ಆದರೆ ಆತ್ಮಾಭಿವ್ಯಕ್ತಿಯ ಪ್ರಬಲ ಕ್ರಿಯೆ ಕೂಡ.
ನಾನು ಅಡುಗೆ ಮಾಡಲು ಪ್ರಾರಂಭಿಸಿದಾಗ, ನನ್ನಂತಹ ಕಪ್ಪು ಮೈಬಣ್ಣದ ಮತ್ತು ತಮಿಳುನಾಡಿನ ಯಾರಾದರೂ ಇಂತಹ ಸ್ಥಳಕ್ಕೆ ಬರಲು ಸಾಧ್ಯವಾಗುತ್ತದೆ ಎಂದು ನಾನು ಎಂದಿಗೂ ಭಾವಿಸಿರಲಿಲ್ಲ ಎಂದು ಅವರು ತಮ್ಮ ಪ್ರಶಸ್ತಿ ಸ್ವೀಕಾರ ಭಾಷಣದಲ್ಲಿ ಹೇಳಿದ್ದಾರೆ. ಅವರು ತಮ್ಮ ಸಾಂಸ್ಕೃತಿಕ ಹಿನ್ನೆಲೆಯನ್ನು ಪ್ರತಿಬಿಂಬಿಸುವ ಸಾಂಪ್ರದಾಯಿಕ ತಮಿಳು ಪುರುಷರ ಉಡುಗೆ, ವೇಷ ಧರಿಸಿ ಕಾರ್ಯಕ್ರಮಕ್ಕೆ ಆಗಮಿಸಿದ್ದರು.
ಎಂಜಿನಿಯರಿಂಗ್ ಅಧ್ಯಯನ ಮಾಡಲು ಯಾವುದೇ ಸೌಲಭ್ಯಗಳಿಲ್ಲದ ಕಾರಣ ವಿಜಯ್ ಅಡುಗೆ ಅಧ್ಯಯನ ಮಾಡಲು ಆಯ್ಕೆ ಮಾಡಿಕೊಂಡಿದ್ದಾರೆ. ಅವರ ಪ್ರಯಾಣವು ಚೆನ್ನೈನ ತಾಜ್ ಕನ್ನೆಮಾರ ಹೋಟೆಲ್‍ನಲ್ಲಿ ಪ್ರಾರಂಭವಾಯಿತು. ನಂತರ ಅವರು ಹಡಗುಗಳಲ್ಲಿ ಮತ್ತು ಹಲವಾರು ರೆಸ್ಟೋರೆಂಟ್‍ಗಳಲ್ಲಿ ಕೆಲಸ ಮಾಡಿದ್ದಾರೆ. ಕೊನೆಗೆ, ಅವರು ಅಮೆರಿಕದ ಸ್ಯಾನ್ ಫ್ರಾನ್ಸಿಸ್ಕೋದಲ್ಲಿರುವ ದೋಸಾ ರೆಸ್ಟೋರೆಂಟ್‍ಗೆ ಸೇರಿದರು.
ನ್ಯೂಯಾರ್ಕ್ ರೆಸ್ಟೋರೆಂಟ್ ಗ್ರೂಪ್ ಉನಾಪೆÇಲೊಜೆಟಿಕ್ ಫುಡ್ಸ್‍ನ ರೋನಿ ಮಜುಂದಾರ್ ಮತ್ತು ಚಿಂತನ್ ಪಾಂಡ್ಯ ಅವರೊಂದಿಗೆ ಕೈಜೋಡಿಸಿದಾಗ ಅವರ ಜೀವನದಲ್ಲಿ ಒಂದು ಮಹತ್ವದ ತಿರುವು ಬಂದಿತು. ಅವರೊಂದಿಗೆ ವಿಜಯ್ ಕುಮಾರ್ 2021 ರಲ್ಲಿ ಸೆಮ್ಮಾ ಎಂಬ ರೆಸ್ಟೋರೆಂಟ್ ಪ್ರಾರಂಭಿಸಿದ್ದಾರೆ.
ದಿ ನ್ಯೂಯಾರ್ಕ್ ಟೈಮ್ಸ್‍ನ 100 ಅತ್ಯುತ್ತಮ ರೆಸ್ಟೋರೆಂಟ್‍ಗಳ ಪಟ್ಟಿಯಲ್ಲಿ ನಂ. 1 ಸ್ಥಾನದಲ್ಲಿರುವ ಚೆಮ್ಮಾ, ಪ್ರಸ್ತುತ ಮೈಕೆಲಿನ್ ಸ್ಟಾರ್ ಸ್ಥಾನಮಾನವನ್ನು ಹೊಂದಿರುವ ನ್ಯೂಯಾರ್ಕ್‍ನ ಏಕೈಕ ಭಾರತೀಯ ರೆಸ್ಟೋರೆಂಟ್ ಆಗಿದ್ದು, ಸತತ ಮೂರು ವರ್ಷಗಳಿಂದ ಈ ಸಾಧನೆಯನ್ನು ಮಾಡಿದೆ.
ವಿಜಯ್ ಅವರ ಶಕ್ತಿ ಇರುವುದು ಕಾಲೋಚಿತ ಪದಾರ್ಥಗಳನ್ನು ಬಳಸಿ ನಿಜವಾದ ಹಳ್ಳಿಯ ಆಹಾರವನ್ನು ಬಡಿಸುವುದರಲ್ಲಿ. ಅವರು ಸ್ಥಳೀಯವಾಗಿ ಸಿಗುವ ಪದಾರ್ಥಗಳೊಂದಿಗೆ ಅಡುಗೆ ಮಾಡುತ್ತಾರೆ.
ಈ ಬಗ್ಗೆ ಮಾತನಾಡಿದ ಚೆನ್ನೈ ಮೂಲದ ಆಹಾರದ ಇತಿಹಾಸವನ್ನು ಅಧ್ಯಯನ ಮಾಡುವ ರಾಕೇಶ್ ರಘುನಂದನ್, ಈಗಾಗಲೇ ಈ ಪ್ರಶಸ್ತಿಗಳನ್ನು ಗೆದ್ದಿರುವ ರಾಘವನ್ ಅಯ್ಯರ್ ಮತ್ತು ಪದ್ಮ ಲಕ್ಷ್ಮಿ ಮೂಲಕ ವಿಜಯ್ ಕುಮಾರ್ ಅವರ ಮನ್ನಣೆ, ಜಾಗತಿಕ ಪಾಕಶಾಲೆಯ ಕ್ಷೇತ್ರದಲ್ಲಿ ದಕ್ಷಿಣ ಭಾರತೀಯರ ಬೆಳೆಯುತ್ತಿರುವ ಧ್ವನಿಗಳನ್ನು ಪ್ರತಿಬಿಂಬಿಸುತ್ತದೆ ಎಂದು ಹೇಳಿದ್ದಾರೆ.
ಶ್ರೀಲಂಕಾದ ತಮಿಳು ಮತ್ತು ಇತರ ದಕ್ಷಿಣ ಭಾರತದ ಪಾಕಪದ್ಧತಿಗಳ ಜೊತೆಗೆ, ತಮಿಳು ಪಾಕಪದ್ಧತಿಯನ್ನು ಪ್ರಪಂಚದಾದ್ಯಂತದ ರೆಸ್ಟೋರೆಂಟ್‍ಗಳಲ್ಲಿ ಸುಧಾರಿತ, ಉನ್ನತ ಮತ್ತು ಸಾಂಸ್ಕೃತಿಕವಾಗಿ ಬೇರೂರಿರುವ ಪಾಕಪದ್ಧತಿಯಾಗಿ ಸ್ವೀಕರಿಸಲಾಗುತ್ತಿದೆ ಎಂದು ಅವರು ವರ್ಣಿಸಿದ್ದಾರೆ.