ಕಲಬುರಗಿ: “ಪವಿತ್ರ ರಂಜಾನ್ ಮಾಸದ ಉದ್ದಕ್ಕೂ ಮಸೀದಿ ಅಲ್-ಅಕ್ಸಾವನ್ನು ಮುಚ್ಚಲಾಗಿದೆ. ಆದರೆ ಮುಸ್ಲಿಂ ರಾಷ್ಟ್ರಗಳು ಯಾವುದೇ ದೃಢವಾದ ಕ್ರಮ ಕೈಗೊಂಡಿಲ್ಲ. ಇಸ್ರೇಲ್ ಮತ್ತು ಅಮೆರಿಕದ ಭಯವು ಅವರ ಹೃದಯದಲ್ಲಿ ಮನೆಮಾಡಿದ್ದು, ಈ ಮೌನವು ಅತ್ಯಂತ ವಿಷಾದನೀಯವಾಗಿದೆ,” ಎಂದು ಆಲ್ ಇಂಡಿಯಾ ಮಿಲ್ಲಿ ಕೌನ್ಸಿಲ್ನ ರಾಷ್ಟ್ರೀಯ ಕಾರ್ಯದರ್ಶಿ ಹಾಗೂ ಸೀರತ್-ಉನ್-ನಬಿ ಸ್ಟಡಿ ಅಂಡ್ ರಿಸರ್ಚ್ ಸೆಂಟರ್ ಕರ್ನಾಟಕದ ಅಧ್ಯಕ್ಷರಾದ ಡಾ. ಮುಹಮ್ಮದ್ ಅಸಗರ ಚುಲಬುಲ್ ಕಳವಳ ವ್ಯಕ್ತಪಡಿಸಿದರು.
ಗುಲ್ಬರ್ಗದ ಪಡಾ ಅಲ್ಲಾ ಕಾಲೋನಿಯ ಮಸೀದಿ ಉಮರ್ ಫಾರೂಕ್ನಲ್ಲಿ ಮಾರ್ಚ್ ೨೦ ರಂದು ಆಯೋಜಿಸಲಾಗಿದ್ದ ‘ಯೌಮ್-ಅಲ್-ಖುದ್ಸ್’ ಸಭೆಯನ್ನುದ್ದೇಶಿಸಿ ಅವರು ಮಾತನಾಡುತ್ತಿದ್ದರು. ವಿಶ್ವಸಂಸ್ಥೆಯು ತಕ್ಷಣವೇ ಸ್ವತಂತ್ರ ಪ್ಯಾಲೆಸ್ಟೈನ್ ರಾಷ್ಟ್ರವನ್ನು ಘೋಷಿಸುವಂತೆ ಆಲ್ ಇಂಡಿಯಾ ಮಿಲ್ಲಿ ಕೌನ್ಸಿಲ್ ವತಿಯಿಂದ ನಗರದಲ್ಲಿ ಆಯೋಜಿಸಲಾಗಿದ್ದ ‘ಯೌಮ್-ಅಲ್-ಖುದ್ಸ್’ ಸಭೆಯಲ್ಲಿ ಫಕ್ರುದ್ದೀನ್ ಮಾನ್ಯಾಲ್, ಸಲೀಮುದ್ದೀನ್ ನಿಜಾಮಿ, ಜಬ್ಬಾರ್ ಗೋಲಾ ಅಡ್ವೊಕೇಟ್, ಅಫ್ಜಲ್ ಮಹಮೂದ್ ಮತ್ತು ಯೂಸುಫ್ ಖುರೇಷಿ ಅವರು, ತಮ್ಮ ಭಾಷಣದಲ್ಲಿ ಒತ್ತಾಯಿಸಿದರು
ಪ್ರಮುಖಾಂಶಗಳು: ಇಸ್ರೇಲ್ ಸಂಚು: ಇಸ್ರೇಲ್ ಮೊದಲ ಹಂತದಲ್ಲಿ ಜೆರುಸಲೆಂ ಸುತ್ತಮುತ್ತ ಅಕ್ರಮ ವಸಾಹತುಗಳನ್ನು ನಿರ್ಮಿಸಿತು, ನಂತರ ಗಾಜಾವನ್ನು ನಾಶಪಡಿಸಿತು. ಈಗ ಮಸೀದಿ ಅಲ್-ಅಕ್ಸಾವನ್ನು ಕೆಡವಿ ‘ಹೈಕಲ್-ಎ-ಸುಲೈಮಾನಿ’ ನಿರ್ಮಿಸಲು ಸಂಚು ರೂಪಿಸುತ್ತಿದೆ ಎಂದು ಅವರು ಆರೋಪಿಸಿದರು.
ಅಬ್ರಹಾಂ ಒಪ್ಪಂದಕ್ಕೆ ವಿರೋಧ: ‘ಅಬ್ರಹಾಂ ಒಪ್ಪಂದ’ವನ್ನು (ಂbಡಿಚಿhಚಿm ಂಛಿಛಿoಡಿಜ) ಮುಸ್ಲಿಮರು ಒಪ್ಪುವುದಿಲ್ಲ. ಅಂದಿನ ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಅವರನ್ನು ಮೆಚ್ಚಿಸಲು ಈ ಒಪ್ಪಂದಕ್ಕೆ ಸಹಿ ಹಾಕಿದ ಈಜಿಪ್ಟ್, ಜೋರ್ಡಾನ್ ಮತ್ತು ಯುಎಇ ಕ್ರಮವನ್ನು ಡಾ. ಚಲ್ಬುಲ್ ಖಂಡಿಸಿದರು.
ವಿಶ್ವಸAಸ್ಥೆಗೆ ಆಗ್ರಹ: ಪ್ಯಾಲೆಸ್ಟೈನ್ ಅನ್ನು ತಕ್ಷಣವೇ ಸ್ವತಂತ್ರ ರಾಷ್ಟ್ರವೆಂದು ಘೋಷಿಸಬೇಕು ಮತ್ತು ಜೆರುಸಲೆಂ ಹಾಗೂ ಗಾಜಾದ ಮೇಲಿನ ಅಕ್ರಮ ಕಬಳಿಕೆಯನ್ನು ಕೊನೆಗೊಳಿಸಲು ಇಸ್ರೇಲ್ ವಿರುದ್ಧ ಕಠಿಣ ನಿರ್ಣಯ ಕೈಗೊಳ್ಳಬೇಕು ಎಂದು ಅವರು ಒತ್ತಾಯಿಸಿದರು.
ಮೌಲಾನಾ ಫಕ್ರುದ್ದೀನ್ ಮಾನ್ಯಾಲ್: ಮಸೀದಿ ಅಲ್-ಅಕ್ಸಾದ ಪವಿತ್ರತೆಯನ್ನು ಕುರಾನ್ನಲ್ಲಿ ವಿವರಿಸಲಾಗಿದೆ. ಅದನ್ನು ಇಸ್ರೇಲ್ನ ಹಿಡಿತದಿಂದ ಮುಕ್ತಗೊಳಿಸಲು ಮುಸ್ಲಿಂ ಸಮುದಾಯವು ಎಲ್ಲ ಸಾಧ್ಯ ಪ್ರಯತ್ನಗಳನ್ನು ಮಾಡಬೇಕು ಎಂದು ಕರೆ ನೀಡಿದರು.
ಮೌಲಾನಾ ಶೇಖ್ ಸಲೀಮುದ್ದೀನ್ ನಿಜಾಮಿ: ಯುವಕರು ಇಸ್ಲಾಂ ಮತ್ತು ಮಸೀದಿ ಅಲ್-ಅಕ್ಸಾದ ಇತಿಹಾಸವನ್ನು ಅಧ್ಯಯನ ಮಾಡುವಂತೆ ಅವರು ಒತ್ತಾಯಿಸಿದರು., ಅಬ್ದುಲ್ ಜಬ್ಬಾರ್ ಗೋಲಾ (ಅಡ್ವೊಕೇಟ್): ವಿಶ್ವಸಂಸ್ಥೆಯು ತಕ್ಷಣ ಮಧ್ಯಪ್ರವೇಶಿಸಿ ಪ್ಯಾಲೆಸ್ಟೈನ್ಗೆ ಪ್ರತ್ಯೇಕ ರಾಷ್ಟ್ರದ ಮಾನ್ಯತೆ ನೀಡಬೇಕು ಎಂದರು. ಮೌಲಾನಾ ಯೂಸುಫ್ ಖುರೇಷಿ: ರಂಜಾನ್ ನಂತರವೂ ಮಸೀದಿಗಳನ್ನು ಜೀವಂತವಾಗಿಡಬೇಕು ಮತ್ತು ಪ್ಯಾಲೆಸ್ಟೈನ್ ಸಂತ್ರಸ್ತರಿಗಾಗಿ ಹಾಗೂ ವಿಶ್ವ ಶಾಂತಿಗಾಗಿ ಪ್ರಾರ್ಥಿಸಬೇಕು ಎಂದು ಮನವಿ ಮಾಡಿದರು. ಅಫ್ಜಲ್ ಮಹಮೂದ್: ಇರಾನ್ ಮೇಲಿನ ದಾಳಿಯು ಗಾಜಾ ಮತ್ತು ಮಸೀದಿ ಅಲ್-ಅಕ್ಸಾದಿಂದ ವಿಶ್ವದ ಗಮನವನ್ನು ಬೇರೆಡೆಗೆ ಸೆಳೆಯುವ ತಂತ್ರವಾಗಿದೆ ಎಂದು ಹೇಳಿದರು.
ಈ ಕಾರ್ಯಕ್ರಮವು ಖಾರಿ ಸಿದ್ದಿಕ್ ಹುಸೇನ್ ಅವರ ಕುರಾನ್ ಪಠಣದೊಂದಿಗೆ ಪ್ರಾರಂಭವಾಯಿತು. ಮುಹಮ್ಮದ್ ಅಫಾನ್ ನಾತ್ ಪ್ರಸ್ತುತಪಡಿಸಿದರು. ವೇದಿಕೆಯ ಮೇಲೆ ಸೈಯದ್ ಮಕ್ಬೂಲ್ ಅಹ್ಮದ್, ಖ್ವಾಜಾ ಪಾಷಾ ಇನಾಮದಾರ್, ಮುಹಮ್ಮದ್ ಆರೀಫ್, ಯೂನಿಸ್ ಅಹ್ಮದ್ ಶಾಹಿದ್ರಿ, ಪ್ರೊ. ಅಬ್ದುಲ್ ಬಾರಿ, ಮನ್ಸೂರ್ ಜುನೈದಿ ಸೇರಿದಂತೆ ಹಲವು ಗಣ್ಯರು ಮತ್ತು ಹೆಚ್ಚಿನ ಸಂಖ್ಯೆಯಲ್ಲಿ ಯುವಕರು ಹಾಗೂ ಹಿರಿಯರು ಭಾಗವಹಿಸಿದ್ದರು.