ನವದೆಹಲಿ, ಸೆ. ೫: ಇತ್ತೀಚೆಗೆ ಸಾಮಾನ್ಯ ಜನರಿಗೆ ಸ್ವಲ್ಪ ಪರಿಹಾರ ಕಲ್ಪಿಸುವ ನಿಟ್ಟಿನಲ್ಲಿ ಸರಕು ಮತ್ತು ಸೇವಾ ತೆರಿಗೆ (ಜಿಎಸ್ ಟಿ) ದರಗಳನ್ನು ಕಡಿತಗೊಳಿಸಿದ ಬೆನ್ನಲ್ಲೇ ನರೇಂದ್ರ ಮೋದಿ ಸರ್ಕಾರ ಈಗ ಡೊನಾಲ್ಡ್ ಟ್ರಂಪ್ ಅವರ ಹೊಸ ಸುಂಕದಿಂದಾಗಿ ತೊಂದರೆಗೀಡಾದ ರಫ್ತುದಾರರನ್ನು ಬೆಂಬಲಿಸಲು ಯೋಜಿಸುತ್ತಿದೆ.
ಅಮೆರಿಕ ಆಡಳಿತ ಇತ್ತೀಚೆಗೆ ಘೋಷಿಸಿದ ಹೆಚ್ಚಿನ ಆಮದು ಸುಂಕವನ್ನು ಎದುರಿಸಲು ಹೆಣಗಾಡುತ್ತಿರುವ ರಫ್ತುದಾರರಿಗೆ ಸರ್ಕಾರ ಪರಿಹಾರ ಪ್ಯಾಕೇಜ್ ಅನ್ನು ಸಿದ್ಧಪಡಿಸುತ್ತಿದೆ ಎಂದು ಮೂಲಗಳು ತಿಳಿಸಿವೆ.
ಭಾರತದ ಇತ್ತೀಚಿನ ಜಿಎಸ್ ಟಿ ೨.೦ ಸುಧಾರಣೆಗಳು ಸ್ವದೇಶದಲ್ಲಿ ಗೃಹ ಬಜೆಟ್ ಗಳನ್ನು ಸ್ಥಿರಗೊಳಿಸಿವೆ. ಆದರೆ ಸಾಗರರೊತ್ತರ ವ್ಯವಹಾರ ನಡೆಸುವವರಿಗೆ, ಟ್ರಂಪ್ ಅವರ ದುಬಾರಿ ಸುಂಕಗಳು ರಫ್ತುದಾರರನ್ನು ಅಸ್ಥಿರಗೊಳಿಸಿವೆ.
“ರಫ್ತುದಾರರಿಗೆ ನೆರವಾಗುವ ನಿಟ್ಟಿನಲ್ಲಿ ಚರ್ಚೆಗಳು ನಡೆಯುತ್ತಿವೆ. ಟ್ರಂಪ್ ಆಡಳಿತವು ವಿಧಿಸಿದ ಶೇ.೫೦ ರಷ್ಟು ಸುಂಕದ ಪರಿಣಾಮವನ್ನು ನಿರ್ವಹಿಸಲು ರಫ್ತುದಾರರಿಗೆ ಸಹಾಯ ಮಾಡುವ ಯೋಜನೆಗಳನ್ನು ಶೀಘ್ರದಲ್ಲೇ ಘೋಷಿಸಬಹುದು,” ಎಂದು ಸರ್ಕಾರಿ ಅಧಿಕಾರಿಗಳು ತಿಳಿಸಿದ್ದಾರೆ.
ಜವಳಿ ಮತ್ತು ಉಡುಪು ಜೊತೆಗೆ ರತ್ನಗಳು ಮತ್ತು ಆಭರಣಗಳು ‘ಐಷಾರಾಮಿ ಸರಕುಗಳ’ ಪಟ್ಟಿಗೆ ಸೇರಿವೆ. ಇದು ಒಟ್ಟಾಗಿ ಭಾರತದ ರಫ್ತು ಗಳಿಕೆಯಲ್ಲಿ ಹೆಚ್ಚಿನ ಪಾಲನ್ನು ಹೊಂದಿದೆ.
ಇತರ ಕೈಗಾರಿಕೆಗಳಲ್ಲಿನ ರಫ್ತುದಾರರು ಸಹ ಒತ್ತಡದಲ್ಲಿದ್ದಾರೆ. ಇವುಗಳಲ್ಲಿ ಚರ್ಮ ಮತ್ತು ಪಾದರಕ್ಷೆಗಳು, ರಾಸಾಯನಿಕಗಳು, ಎಂಜಿನಿಯರಿಂಗ್ ಉತ್ಪನ್ನಗಳು ಮತ್ತು ಕೃಷಿ ಮತ್ತು ಸಾಗರೊತ್ತರ ರಫ್ತುಗಳು ಸೇರಿವೆ
