ಕೋಲಾರ,ಅ,೧೬- ಅಖಿಲ ಭಾರತ ಕಾಂಗ್ರೆಸ್ ಸಮಿತಿಯಿಂದ ಕೇರಳ ರಾಜ್ಯದಲ್ಲಿ ಪಕ್ಷದ ವಾರ್ರಂ ಅಧ್ಯಕ್ಷರಾಗಿ ನೇಮಕಗೊಂಡಿರುವ ಮಾಜಿಸ್ಪೀಕರ್ ಕೆ.ಆರ್.ರಮೇಶ್ ಕುಮಾರ್ ಅವರ ಪುತ್ರ ಹರ್ಷ ಕನಡಂ ಇಂದು ಎಐಸಿಸಿ ಪ್ರಧಾನ ಕಾರ್ಯದರ್ಶಿ ಹಾಗೂ ಸಂಸದ ಕೆ.ಸಿ.ವೇಣುಗೋಪಾಲ್ ಅವರನ್ನು ಭೇಟಿಯಾಗಿ ಧನ್ಯವಾದ ಸಲ್ಲಿಸಿದ್ದಲ್ಲದೇ ಕೇರಳದಲ್ಲಿ ಪಕ್ಷವನ್ನು ಅಧಿಕಾರಕ್ಕೆ ತರಲು ಕೈಗೊಳ್ಳಬೇಕಾದ ಚಟುವಟಿಕೆಗಳ ಕುರಿತು ಚರ್ಚೆ ನಡೆಸಿದರು.
ತಮಗೆ ನೀಡಿದ ಅವಕಾಶಕ್ಕಾಗಿ ಧನ್ಯವಾದ ಸಲ್ಲಿಸಿದ ಅವರು, ಕೇರಳದಲ್ಲಿ ಕಾಂಗ್ರೆಸ್ ಪಕ್ಷವನ್ನು ಮತ್ತೆ ಅಧಿಕಾರಕ್ಕೆ ತರಲು ಬದ್ದತೆಯಿಂದ ಕೆಲಸ ಮಾಡುವುದಾಗಿಯೂ ತಿಳಿಸಿ, ಸಹಕಾರ ಹಾಗೂ ಮಾರ್ಗದರ್ಶನ ಕೋರಿದರು.
ಕರ್ನಾಟಕದ ಮಾದರಿಯಲ್ಲೇ ಕೇರಳದಲ್ಲೂ ಕಾಂಗ್ರೆಸ್ ಪಕ್ಷಕ್ಕೆ ಅಧಿಕಾರಕ್ಕೆ ಬರಲು ಹೆಚ್ಚಿನ ಅವಕಾಶಗಳಿವೆ, ಪಕ್ಷದ ನಾಯಕ ರಾಹುಲ್ಗಾಂಧಿಯವರೂ ಸಹಾ ಈ ರಾಜ್ಯದಿಂದಲೇ ಸಂಸದರಾಗಿದ್ದಾರೆ, ಇಲ್ಲಿ ಪಕ್ಷವನ್ನು ಕೆಳಹಂತದಿಂದಲೂ ಗಟ್ಟಿಗೊಳಿಸಿ ಮುಂದಿನ ಚುನಾವಣೆಗೆ ಪಕ್ಷವನ್ನು ಅಣಿಗೊಳಿಸುವ ಕಾರ್ಯಕ್ಕೆ ಅವಕಾಶ ನೀಡಿದ್ದಕ್ಕಾಗಿ ಪಕ್ಷದ ನಾಯಕರಿಗೆ ಅವರು ಧನ್ಯವಾದ ಸಲ್ಲಿಸಿದರು.
ಸಂಘಟನಾ ಕೌಶಲ್ಯ ಮತ್ತು ಡಿಜಿಟಲ್ ಪರಿಣತಿಯಿಂದ ಪ್ರಸಿದ್ಧರಾದ ಹರ್ಷ ಕನಡಂ ಅವರ ಉನ್ನತಿ, ಕಾಂಗ್ರೆಸ್ ಪಕ್ಷದ ರಾಜಕೀಯ ಅಭಿಯಾನಗಳಿಗೆ ಹೊಸ ಶಕ್ತಿ ಮತ್ತು ಆಧುನಿಕ ತಂತ್ರಜ್ಞಾನವನ್ನು ನೀಡುವ ಪ್ರಯತ್ನದ ಭಾಗವಾಗಿ ಈ ನೇಮಕ ನಡೆದಿದೆ.
ಎಐಸಿಸಿ ಸಂಘಟನಾ ಪ್ರಧಾನ ಕಾರ್ಯದರ್ಶಿ ಕೆ.ಸಿ. ವೇಣುಗೋಪಾಲ್ಜಿ, ಹಾಗೂ ಕೇರಳ ಮತ್ತು ಲಕ್ಷದ್ವೀಪದ ಎಐಸಿಸಿ ಕಾರ್ಯದರ್ಶಿ ಮಂಸೂರ್ ಅಲಿ ಖಾನ್ಜಿ ಇವರ ಮಾರ್ಗದರ್ಶನ ಮತ್ತು ಆಶೀರ್ವಾದ ನನಗೆ ಯಾವಾಗಲೂ ಪ್ರೇರಣೆಯಾಗಿದೆ ಎಂದು ತಿಳಿಸಿರುವ ಹರ್ಷ ಅವರ ವಿಶ್ವಾಸ ನನ್ನ ಮೇಲೆ ಒಂದು ದೊಡ್ಡ ಹೊಣೆಗಾರಿಕೆ ನೀಡಿದ್ದು, ಜವಾಬ್ದಾರಿಯಿಂದ ನಿರ್ವಹಿಸುವೆ ಎಂದು ತಿಳಿಸಿದರು.
ಟೆಕ್-ಸಾವಿ ತಂತ್ರಜ್ಞ ಮತ್ತು ನೆಲಮಟ್ಟದ ಸಂಘಟಕರಾದ ಹರ್ಷ ಕನಡಂ ಅವರು ಪಕ್ಷದ ಕಾರ್ಮಿಕರನ್ನು ಡೇಟಾ ಆಧಾರಿತ ವ್ಯವಸ್ಥೆಗಳ ಮೂಲಕ ಒಗ್ಗೂಡಿಸಲು ಹಾಗೂ ತಳಮಟ್ಟದ ಕಾರ್ಯಕರ್ತರೊಂದಿಗೆ ನೇರ ಸಂಪರ್ಕ ಸಾಧಿಸಲು ಪ್ರಮುಖ ಪಾತ್ರ ವಹಿಸಿದ್ದಾರೆ.
ಪಕ್ಷದ ಒಳ ವಲಯದಲ್ಲಿ ಅವರು ತಂತ್ರಜ್ಞಾನ, ಸಂವಹನ ಮತ್ತು ನೆಲಮಟ್ಟದ ಅನುಭವವನ್ನು ಸಮನ್ವಯಗೊಳಿಸಿ ಫಲಿತಾಂಶ ತರುವ ಹೊಸ ತಲೆಮಾರಿನ ಕಾಂಗ್ರೆಸ್ ನಾಯಕರಲ್ಲಿ ಒಬ್ಬರಾಗಿದ್ದಾರೆ ಎಂದು ವಿಶ್ಲೇಷಿಸಲಾಗಿದೆ.ಈ ನೇಮಕ ಒಂದು ಹುದ್ದೆ ಮಾತ್ರವಲ್ಲ, ಇದು ಕೇರಳ ಕಾಂಗ್ರೆಸ್ ಸಂಘಟನೆಯನ್ನು ಆಧುನಿಕ ರಾಜಕೀಯ ತಂತ್ರಜ್ಞಾನ ಮತ್ತು ತಂಡ ಕಾರ್ಯದ ಮೂಲಕ ಬಲಪಡಿಸುವ ಹೊಣೆಗಾರಿಕೆಯಾಗಿದೆ, ಎಂದು ಹರ್ಷ ಕನಡಂ ಈಗಾಗಲೇ ಹೇಳಿದ್ದಾರೆ.
ಹರ್ಷ ಅವರ ಈ ನೇಮಕವನ್ನು ಕರ್ನಾಟಕ ಮತ್ತು ಕೇರಳದ ಕಾಂಗ್ರೆಸ್ ಕಾರ್ಯಕರ್ತರು ಸಂತೋಷದಿಂದ ಸ್ವಾಗತಿಸಿದ್ದಾರೆ. ಯುವ, ಫಲಿತಾಂಶಮುಖಿ ನಾಯಕತ್ವಕ್ಕೆ ರಾಷ್ಟ್ರಮಟ್ಟದ ಜವಾಬ್ದಾರಿಗಳನ್ನು ನೀಡುವ ಪಕ್ಷದ ಬದ್ಧತೆಯ ಸಂಕೇತವಾಗಿ ಈ ನಿಯುಕ್ತಿಯನ್ನು ಅವರು ಪರಿಗಣಿಸಿದ್ದಾರೆ.
