ನವದೆಹಲಿ,ನ.೫: ಹರಿಯಾಣ ವಿಧಾನಸಭಾ ಚುನಾವಣೆಯಲ್ಲಿ ಭಾರೀ ಪ್ರಮಾಣದಲ್ಲಿ ಮತಗಳವು ನಡೆದಿದೆ ಎಂದು ಕಾಂಗ್ರೆಸ್ ಸಂಸದ ರಾಹುಲ್ ಗಾಂಧಿ ಆರೋಪಿಸಿದ್ದಾರೆ. ಕಾಂಗ್ರೆಸ್ ಸ್ಪಷ್ಟ ಗೆಲುವನ್ನು ಬಿಜೆಪಿ ಗೆಲುವಾಗಿ ಪರಿವರ್ತಿಸಲು ಒಂದು ಯೋಜನೆ ರೂಪುಗೊಂಡಿತ್ತು ಎಂದು ಅವರು ಬಾಂಬ್ ಸಿಡಿಸಿದ್ದಾರೆ.
ಚುನಾವಣಾ ಆಯೋಗವು ನಕಲಿ ಮತದಾರರನ್ನು ಗುರುತಿಸುವ ಸಾಪ್ಟ್ವೇರ್(ತಂತ್ರಾಂಶ) ಹೊಂದಿದ್ದರೂ, ಅವರನ್ನು ಮತದಾರರ ಪಟ್ಟಿಯಿಂದ ಅವರನ್ನು ಏಕೆ ತೆಗೆಯಲಾಗುತ್ತಿಲ್ಲ ಎಂದು ಪ್ರಶ್ನಿಸಿದ ರಾಹುಲ್ ಗಾಂಧಿ ಅವರು ‘ವೋಟ್ ಚೋರಿ’ (ಮತಗಳ ಕಳ್ಳತನ) ಎಂಬ ತಮ್ಮ ಆರೋಪಗಳ ಹೊಸ ಅಧ್ಯಾಯವಾಗಿ ಎಚ್ ಫೈಲ್ಸ್’ ಅನ್ನು ಸುದ್ಧಿಗೋಷ್ಠಿಯಲ್ಲಿ ಬಹಿರಂಗಪಡಿಸಿದರು.
ಹರಿಯಾಣದಲ್ಲಿ ಕಾಂಗ್ರೆಸ್ ಸುಲಭವಾಗಿ ಗೆಲ್ಲುತಿತ್ತು ಹರಿಯಾಣದಲ್ಲಿ ೨೫ ಲಕ್ಷ ಮತಗಳ ಕಳ್ಳತನ ವರದಿಯಾಗಿದೆ ಇದರಲ್ಲಿ ೫.೨೧ ಲಕ್ಷ ನಕಲಿ ಮತದಾರರು, ೯೩,೧೭೪ ಅಮಾನ್ಯ ಮತದಾರರು ಮತ್ತು ೧೯.೨೬ ಲಕ್ಷ ಮತದಾರರು (ಸಮೂಹ ಮತದಾರರು) ಸೇರಿದ್ದಾರೆ ಎಂದು ಆರೋಪಿಸಿದರು.
ಇಡೀ ಹರಿಯಾಣ ರಾಜ್ಯದಲ್ಲೆ ಮತ ಕಳವು ಆಗಿದೆ
“ನಮ್ಮಲ್ಲಿ ‘ಎಚ್’ ಫೈಲ್ಸ್ ಇದೆ ಮತ್ತು ಇಡೀ ರಾಜ್ಯದೆಲ್ಲೆಡೆ ಮತ ಕಳವು ನಡೆದಿದೆ ಎಂಬುದರ ಬಗ್ಗೆ ಈ ಫೈಲ್ ಮಾಹಿತಿ ನೀಡುತ್ತದೆ. ಇದು ನಾಯಕರ ವೈಯಕ್ತಿಕ ಕ್ಷೇತ್ರಗಳಲ್ಲಿ ಮಾತ್ರವಲ್ಲ, ರಾಜ್ಯ ಮತ್ತು ರಾಷ್ಟ್ರೀಯ ಮಟ್ಟದಲ್ಲಿ ನಡೆಯುತ್ತಿದೆ ಎಂಬ ಅನುಮಾನ ಇದ್ದುದಾಗಿ ರಾಹುಲ್ ಗಾಂಧಿ ಹೇಳಿದರು.
ಹರಿಯಾಣದಲ್ಲಿ ತಮ್ಮ ಅಭ್ಯರ್ಥಿಗಳಿಂದ ಏನೋ ತಪ್ಪಾಗುತ್ತಿದೆ ಎಂದು ಅನೇಕ ದೂರುಗಳು ಬಂದಿದ್ದವು ಮಧ್ಯಪ್ರದೇಶ, ಛತ್ತೀಸ್ಘಡ ಮಹಾರಾಷ್ಟ್ರದಲ್ಲಿ ಅಗಿದ್ದ ಅನುಭವದ ಕಾರಣ ಹರಿಯಾಣದಲ್ಲಿ ಮತದಾರರ ಪಟ್ಟಿಯನ್ನು ವಿವರವಾಗಿ ಪರಿಶೀಲಿಸಲು ನಿರ್ಧರಿಸಲಾಯಿತು ಎಂದು ಅವರು ತಿಳಿಸಿದರು.
ಬ್ರೆಜಿಲಿಯನ್ ಮಾಡೆಲ್’ ಮತದಾರಳಾಗಿದ್ದಾರೆ?
ರಾಹುಲ್ ಗಾಂಧಿ ಅವರು ಈ ವೇಳೆ ಒಂದು ಗಮನ ಸೆಳೆಯುವ ವಿಷಯವನ್ನೂ ಬಹಿರಂಗಪಡಿಸಿದರು. ಅದೆಂದರೆ ಹರಿಯಾಣದ ಮತದಾರರ ಪಟ್ಟಿಯಲ್ಲಿ ಒಬ್ಬ ’ಬ್ರೆಜಿಲಿಯನ್ ಮಾಡೆಲ್’ ’ಸೀಮಾ’, ’ಸ್ವೀಟಿ’ ಮುಂತಾದ ಹೆಸರುಗಳಲ್ಲಿ ಮತದಾರರಾಗಿ ನಮೂದಾಗಿದ್ದಾರೆ ಎಂದು ಅವರು ಆರೋಪಿಸಿದರು. ಇದನ್ನು ಅವರು ತಮ್ಮ ಹೊಸ ’ಎಚ್-ಬಾಂಬ್’ (ಹರಿಯಾಣ ಬಾಂಬ್) ಎಂಬುದನ್ನು ಬಹಿರಂಗಪಡಿಸಿದರು.
“ಒಬ್ಬ ಮಹಿಳೆ ಮತದಾನದಲ್ಲಿ ೨೨೩ ಬಾರಿ ಕಾಣಿಸಿಕೊಂಡಿದ್ದಾಳೆ ಮತ್ತು ಅವಳು ಸಾಕಷ್ಟು ಬಾರಿ ಮತದಾನ ಮಾಡಿದ್ದಾಳೆ ಚುನಾವಣಾ ಆಯೋಗವು ಅವಳು ಎಷ್ಟು ಬಾರಿ ಮತದಾನ ಮಾಡಿದ್ದಾಳೆ ಎಂಬ ದತ್ತಾಂಶವನ್ನು ಹೊಂದಿದೆ. ಆದರೆ ಅವಳ ಮತದಾನದ ಸಿಸಿಟಿವಿ ಫುಟೇಜ್ ಅನ್ನು ನಾಶಪಡಿಸಿದ್ದು ಇದೇ ಕಾರಣಕ್ಕೆ,” ಎಂದು ರಾಹುಲ್ ಗಾಂಧಿ ದೂರಿದರು.
ಅನಿರೀಕ್ಷಿತ ಪೋಸ್ಟಲ್ ಮತಗಳು
ಎಲ್ಲಾ ಎಕ್ಸಿಟ್ ಪೋಲ್ಗಳು ಕಾಂಗ್ರೆಸ್ ಗೆಲುವನ್ನು ಸೂಚಿಸಿದ್ದವು ಮತ್ತು ಹರಿಯಾಣದ ಚುನಾವಣಾ ಇತಿಹಾಸದಲ್ಲಿ ಮೊದಲ ಬಾರಿಗೆ, ಪೋಸ್ಟಲ್ ಮತಗಳು ನಿಜವಾದ ಮತದಾನಕ್ಕಿಂತ ಭಿನ್ನವಾಗಿದ್ದವು ಎಂದು ಅವರು ಹೇಳಿದರು.
ಇದು ಹರಿಯಾಣದಲ್ಲಿ ಇದುವರೆಗೆ ಎಂದೂ ನಡೆದಿರಲಿಲ್ಲ. ಆದ್ದರಿಂದ, ನಾವು ವಿವರಗಳನ್ನು ಪರಿಶೀಲಿಸಲು ನಿರ್ಧರಿಸಿದೆವು. ನಾನು ಈ ಮಾಹಿತಿಯನ್ನು ಮೊದಲು ನೋಡಿದಾಗ, ನಾನು ಅದನ್ನು ನಂಬಲು ಕಷ್ಟಪಟ್ಟೆ. ನಾನು ಆಘಾತಕ್ಕೊಳಗಾದೆ… ನಾನು ತಂಡಕ್ಕೆ ಅನೇಕ ಬಾರಿ ದ್ವಿಪರೀಕ್ಷೆ ಮಾಡಲು ಹೇಳಿದೆ,” ಎಂದು ರಾಹುಲ್ ಗಾಂಧಿ ತಿಳಿಸಿದರು.
ಕಸಿದ ಕಾಂಗ್ರೆಸ್ ಗೆಲುವು
ಕಾಂಗ್ರೆಸ್ನ ಭೂಮಿಪತ್ ಗೆಲುವನ್ನು ಸೋಲಾಗಿ ಮಾರ್ಪಾಡು ಮಾಡಲು ಒಂದು ಯೋಜನೆ ರೂಪುಗೊಂಡಿತು ಎಂದು ರಾಹುಲ್ ಗಾಂಧಿ ಖಚಿತವಾಗಿ ತಿಳಿಸಿದರು.”ಭಾರತದ ಯುವಜನತೆ, ಇದನ್ನು ಸ್ಪಷ್ಟವಾಗಿ ಅರ್ಥಮಾಡಿಕೊಳ್ಳಬೇಕು ಏಕೆಂದರೆ ಇದು ನಿಮ್ಮ ಭವಿಷ್ಯದ ಬಗ್ಗೆ… ನಾನು ಭಾರತದ ಪ್ರಜಾಪ್ರಭುತ್ವ ಪ್ರಕ್ರಿಯೆ ಮತ್ತು ಚುನಾವಣಾ ಆಯೋಗವನ್ನು ೧೦೦% ಪುರಾವೆಗಳೊಂದಿಗೆ ಪ್ರಶ್ನಿಸುತ್ತಿದ್ದೇನೆ. ಕಾಂಗ್ರೆಸ್ನ ಭೂಮಿಪತ್ ಗೆಲುವನ್ನು ಸೋಲಾಗಿ ಪರಿವರ್ತಿಸಲು ಒಂದು ಯೋಜನೆ ರೂಪುಗೊಂಡಿತು ಎಂದು ನಾವು ಬಹಳ ಖಚಿತವಾಗಿ ನಂಬುತ್ತೇವೆ. ಎಂದು ಅವರು ಹೇಳಿದರು.
ಚುನಾವಣೆಯಲ್ಲಿ ಪಕ್ಷಗಳು ಪಡೆದ ಮತಗಳ ಸಂಖ್ಯೆಗಳು
ಭಾರತೀಯ ಜನತಾ ಪಕ್ಷ (ಬಿಜೆಪಿ) ೨೦೨೪ ಹರಿಯಾಣ ವಿಧಾನಸಭಾ ಚುನಾವಣೆಯಲ್ಲಿ ೫೫,೪೮,೮೦೦ ಮತಗಳನ್ನು (೩೯.೯೪%) ಪಡೆದರೆ, ಕಾಂಗ್ರೆಸ್ ಮತ್ತು ಕಮ್ಯುನಿಸ್ಟ್ ಪಾರ್ಟಿ ಆಫ್ ಇಂಡಿಯಾ (ಮಾರ್ಕ್ಸಿಸ್ಟ್) ಕೂಟ ೫೪,೬೪,೯೭೫ ಮತಗಳನ್ನು (೩೯.೩೪%) ಪಡೆಯಿತು. ಎರಡರ ನಡುವಿನ ವ್ಯತ್ಯಾಸ ಕೇವಲ ೮೩,೮೨೫ ಮತಗಳು (೦.೬೦%) ಆಗಿತ್ತು. ಬಿಜೆಪಿ ೪೮ ಸೀಟುಗಳನ್ನು ಗೆದ್ದರೆ, ಕಾಂಗ್ರೆಸ್ ೩೭ ಸೀಟುಗಳನ್ನು ಗೆದ್ದಿತು ಎಂದು ರಾಹುಲ್ ಹೇಳಿದರು.
ಸೆಪ್ಟೆಂಬರ್ ೧ರಂದು, ರಾಹುಲ್ ಗಾಂಧಿ ಬಿಜೆಪಿಗೆ ಎಚ್ಚರಿಕೆ ನೀಡಿ, ಮಹದೇವಪುರಾ ಬಗ್ಗೆ ಮತಗಳ್ಳನ ಬಹಿರಂಗಪಡಿಸಿದ್ದು ಕೇವಲ ’ಅಣುಬಾಂಬ್’ ಆಗಿತ್ತು ಎಂದು ಹೇಳಿ, ತಮ್ಮ ಮತ ಕಳ್ಳತನದ ಆರೋಪಗಳ ಬಗ್ಗೆ ಶೀಘ್ರದಲ್ಲೇ ’ಹೈಡ್ರೋಜನ್ ಬಾಂಬ್’ ಬಹಿರಂಗಪಡಿಸುವುದಾಗಿ ಹೇಳಿದ್ದರು.
ಮತದಾರ ಅಧಿಕಾರ ಯಾತ್ರೆ’ಯ ಕೊನೆಯ ದಿನದ ಸಭೆಯನ್ನು ಉದ್ದೇಶಿಸಿ ಮಾತನಾಡಿದ ರಾಹುಲ್ ಗಾಂಧಿ, “ಮಹಾತ್ಮ ಗಾಂಧಿಯವರನ್ನು ಹತ್ಯೆ ಮಾಡಿದ ಶಕ್ತಿಗಳು ಈಗ ಭಾರತದ ಸಂವಿಧಾನವನ್ನು ನಾಶಪಡಿಸಲು ಪ್ರಯತ್ನಿಸುತ್ತಿವೆ” ಎಂದು ಬಿಜೆಪಿ ವಿರುದ್ಧ ಟೀಕೆ ಮಾಡಿದ್ದರು.
ಕಾಂಗ್ರೆಸ್ ಸಂಸದ ಮತ್ತು ಲೋಕಸಭಾ ಪ್ರತಿಪಕ್ಷ ನೇತಾರ ರಾಹುಲ್ ಗಾಂಧಿ ನೇತೃತ್ವ ವಹಿಸಿದ್ದ ೧೬-ದಿನಗಳ ’ಮತದಾರ ಅಧಿಕಾರ ಯಾತ್ರೆ’ ಮತದಾರರ ಹಕ್ಕುಗಳ ಬಗ್ಗೆ ಜಾಗೃತಿ ಮೂಡಿಸಲು ಮತ್ತು ಆರೋಪಿತ “ಮತ ಕಳ್ಳತನ” ಮತ್ತು ಚುನಾವಣಾ ಪಟ್ಟಿಯ ವಿಶೇಷ ತೀವ್ರ ಪರಿಷ್ಕರಣೆಯಲ್ಲಿ (ಎಸ್ಐಆರ್) ಕ್ರಮಬದ್ಧತೆಯಿರಲಿಲ್ಲ ಎನ್ನುವುದರ ವಿರೋಧದ ನಡುವೆಯೂ ಮತ ಪರಿಷ್ಕರಣೆ ನಡೆಸಲಾಗಿತ್ತು ಎಂದು ರಾಹುಲ್ ಆರೋಪಿಸಿದರು.
ಮತಕಳವು ಮತ್ತೆ ಬಹಿರಂಗ ಸಿಎಂ
ದೇಶದ ಚುನಾವಣಾ ವ್ಯವಸ್ಥೆಯಲ್ಲಿ ನಡೆಯುತ್ತಿರುವ ವ್ಯವಸ್ಥಿತ ಅಕ್ರಮಗಳ ಕರಾಳ ಮುಖವನ್ನು ಲೋಕಸಭೆಯ ವಿಪಕ್ಷ ನಾಯಕರಾದ ರಾಹುಲ್ ಗಾಂಧಿ ಅವರು ಮತ್ತೊಮ್ಮೆ ಬಹಿರಂಗಪಡಿಸಿದ್ದಾರೆ ಎಂದು ಮುಖ್ಯಮಂತ್ರಿ ಸಿದ್ದರಾಮಯ್ಯ ಹೇಳಿದರು.
ಈ ಕುರಿತು ಎಕ್ಸ್ ನಲ್ಲಿ ಮಾಹಿತಿ ಹಂಚಿಕೊಂಡಿರುವ ಅವರು, ಮೊದಲು ಕರ್ನಾಟಕದ ಮಹದೇವಪುರ, ನಂತರ ಅಳಂದ ವಿಧಾನಸಭಾ ಮತಗಳ್ಳತನವನ್ನು ಬಯಲು ಮಾಡಿದ್ದರು, ಇಂದು ಹರಿಯಾಣ ರಾಜ್ಯದ ಇಡೀ ಚುನಾವಣಾ ಫಲಿತಾಂಶವನ್ನೇ ಹೇಗೆ ಬುಡಮೇಲು ಮಾಡಿದ್ದಾರೆ ಎಂಬುದನ್ನು ದಾಖಲೆ ಸಹಿತ ಜನರ ಮುಂದಿಟ್ಟಿದ್ದಾರೆ.
ಪಾರದರ್ಶಕ, ನಿಷ್ಪಕ್ಷಪಾತ ಚುನಾವಣೆಯ ಮೂಲಕ ಪ್ರಜಾತಂತ್ರದ ರಕ್ಷಣೆಯ ಮಾಡಬೇಕಿರುವ ಚುನಾವಣಾ ಆಯೋಗವೇ ಕೇಂದ್ರ ಸರ್ಕಾರದ ಜೊತೆಗೂಡಿ ಹೇಗೆ ಪ್ರಜಾತಂತ್ರ ವ್ಯವಸ್ಥೆಯ ಕತ್ತು ಹಿಸುಕುತ್ತಿದೆ ಎಂಬುದಕ್ಕೆ ಈ ದಾಖಲೆಗಳು ಸಾಕ್ಷಿ ಎಂದರು.
ಮಹಾರಾಷ್ಟ್ರ ಮತ್ತು ಕರ್ನಾಟಕ ವಿಧಾನಸಭಾ ಚುನಾವಣೆಯಲ್ಲಿ ಭಾರತೀಯರ ಹೆಸರುಗಳನ್ನಷ್ಟೇ ಬಳಸಿ ನಕಲಿ ಮತದಾರರನ್ನು ಸೃಷ್ಟಿಸುತ್ತಿದ್ದ ಬಿಜೆಪಿ ಮತ್ತು ಚುನಾವಣಾ ಆಯೋಗ, ಹರಿಯಾಣದಲ್ಲಿ ಒಂದು ಹೆಜ್ಜೆ ಮುಂದೆ ಹೋಗಿ ಬ್ರೆಜಿಲ್ನ ರೂಪದರ್ಶಿಯ ಗುರುತನ್ನು ಕೂಡ ತನ್ನ ಮತಗಳ್ಳತನಕ್ಕೆ ಬಳಕೆ ಮಾಡಿಕೊಂಡಿರುವುದು ಅವರ ನಿರ್ಲಜ್ಜತನಕ್ಕೆ ಸಾಕ್ಷಿ.
ಈ ಬಾರಿ ಅಂತಾರಾಷ್ಟ್ರೀಯ ಮಟ್ಟದಲ್ಲಿ ದೇಶ ಮತ್ತು ಪ್ರಜಾಪ್ರಭುತ್ವ ವ್ಯವಸ್ಥೆಯ ಮಾನ ಹೋಗುವುದು ಗ್ಯಾರಂಟಿ ಎಂದು ಟೀಕಿಸಿದ್ದಾರೆ
೫ ಲಕ್ಷಕ್ಕೂ ಅಧಿಕ ನಕಲಿ ಮತದಾರರು, ತಿರುಚಿದ ಅಥವಾ ಗುರುತಿಸಲು ಸಾಧ್ಯವಾಗದಂತಹ ಫೋಟೊ ಬಳಸಿ ೧ ಲಕ್ಷಕ್ಕೂ ಅಧಿಕ ಮತಗಳನ್ನು ಕಳವು ಮಾಡಲಾಗಿದೆ. ಹೀಗೆ ಒಟ್ಟು ಹರಿಯಾಣ ವಿಧಾನಸಭಾ ಚುನಾವಣೆಯಲ್ಲಿ ೨೫ ಲಕ್ಷಕ್ಕೂ ಅಧಿಕ ಮತಗಳ್ಳತನ ನಡೆದಿದೆ. ಅಂದರೆ ಹರಿಯಾಣದಲ್ಲಿ ಮತ ಚಲಾಯಿಸಿದ ಪ್ರತಿ ೮ ಜನರ ಪೈಕಿ ಒಂದು ನಕಲಿ ಮತ ಎನ್ನುವುದು ಸ್ಪಷ್ಟ ಎಂದಿದ್ದಾರೆ.
ದೇಶದ ಬಹುತೇಕ ಚುನಾವಣಾ ಸಮೀಕ್ಷೆಗಳು ಹರಿಯಾಣದಲ್ಲಿ ಬಿಜೆಪಿ ಧೂಳಿಪಟವಾಗಲಿದೆ ಎನ್ನುವ ಭವಿಷ್ಯ ನುಡಿದಿದ್ದರೂ, ಹರಿಯಾಣದ ಜನ ಈ ಬಾರಿ ಬಿಜೆಪಿ ಸರ್ಕಾರವನ್ನು ಕಿತ್ತೊಗೆಯಲೇಬೇಕು ಎಂಬ ದೃಢ ಸಂಕಲ್ಪ ಮಾಡಿದರೂ ಬಿಜೆಪಿ ಹೇಗೆ ಬಹುಮತ ಪಡೆದು ಸರ್ಕಾರ ರಚಿಸಿತು ಎನ್ನುವ ಅನುಮಾನಕ್ಕೆ ರಾಹುಲ್ ಗಾಂಧಿಯವರು ಉತ್ತರ ನೀಡಿದ್ದಾರೆ.
ತಮ್ಮ ಮೇಲಿನ ಆರೋಪಗಳಿಗೆ ಹಾರಿಕೆ ಉತ್ತರ ನೀಡಿ ಪಲಾಯನ ಮಾಡುತ್ತಿದ್ದ, ಆರೋಪ ಮಾಡಿದವರನ್ನೇ ಪ್ರಮಾಣ ಮಾಡಿ ಎಂದು ಅಸಂಬದ್ಧವಾಗಿ ಮಾತನಾಡುತ್ತಿದ್ದ ಮುಖ್ಯ ಚುನಾವಣಾ ಆಯುಕ್ತ ಜ್ಞಾನೇಶ್ ಕುಮಾರ್ ಈ ಬಾರಿಯಾದರೂ “ತನ್ನ ಮಾಲೀಕರ” ರಕ್ಷಣೆಯ ದುಸ್ಸಾಹಸಕ್ಕೆ ಕೈಹಾಕದೆ ಸತ್ಯ ಒಪ್ಪಿಕೊಂಡು, ಮಾಡಿದ ಪಾಪಗಳಿಗೆ ಕಾನೂನಿನ ಮೂಲಕ ಪ್ರಾಯಶ್ಚಿತ್ತ ಮಾಡಿಕೊಳ್ಳಲಿ ಎಂದು ಹೇಳಿದ್ದಾರೆ.
