200ಕ್ಕೂ ಹೆಚ್ಚು ಚಿತ್ರಮಂದಿರಗಳಲ್ಲಿ ಬಿಡುಗಡೆಯ ಸಂಭ್ರಮ
ಸ್ಯಾಂಡಲ್ವುಡ್ನಲ್ಲಿ ಒಮ್ಮೆ ಸಂಚಲನ ಮೂಡಿಸಿದ್ದ ‘ಮೆಜೆಸ್ಟಿಕ್’ ಹೆಸರನ್ನು ಮತ್ತೆ ನೆನಪಿಗೆ ತರುವಂತೆ ಸಿದ್ಧವಾಗಿರುವ ಆಕ್ಷನ್-ಮಾಸ್ ಚಿತ್ರ ‘ಮೆಜೆಸ್ಟಿಕ್-2’ ಈ ವಾರ ರಾಜ್ಯಾದ್ಯಂತ 200ಕ್ಕೂ ಹೆಚ್ಚು ಚಿತ್ರಮಂದಿರಗಳಲ್ಲಿ ಭರ್ಜರಿಯಾಗಿ ತೆರೆ ಕಾಣುತ್ತಿದೆ. ಹೊಸ ನಾಯಕನ ಎಂಟ್ರಿ, ಮೆಜೆಸ್ಟಿಕ್ ಪ್ರದೇಶದ ನೈಜ ಹಿನ್ನೆಲೆ ಮತ್ತು ರೌಡಿಸಂ ಕಥಾಹಂದರದೊಂದಿಗೆ ಚಿತ್ರ ಪ್ರೇಕ್ಷಕರಲ್ಲಿ ಕುತೂಹಲ ಮೂಡಿಸಿದೆ.
ಅಮ್ಮಾ ಎಂಟರ್ಪ್ರೈಸಸ್ ಬ್ಯಾನರ್ ಅಡಿಯಲ್ಲಿ ಕೋಟೆನಾಡು ಚಿತ್ರದುರ್ಗದ ಹೆಚ್. ಆನಂದಪ್ಪ ಈ ಚಿತ್ರವನ್ನು ಅದ್ದೂರಿಯಾಗಿ ನಿರ್ಮಿಸಿದ್ದಾರೆ. ಹಿರಿಯ ನಿರ್ಮಾಪಕ ಶಿಲ್ಪಾ ಶ್ರೀನಿವಾಸ್ ಅವರ ಪುತ್ರ ಭರತ್ ಕುಮಾರ್ ಈ ಚಿತ್ರದ ಮೂಲಕ ಸ್ಯಾಂಡಲ್ವುಡ್ಗೆ ನಾಯಕನಾಗಿ ಪರಿಚಯವಾಗುತ್ತಿದ್ದಾರೆ.
ಇದಕ್ಕೂ ಮೊದಲು ಇದೇ ಹೆಸರಿನ ‘ಮೆಜೆಸ್ಟಿಕ್’ ಚಿತ್ರದ ಮೂಲಕ ಚಾಲೆಂಜಿಂಗ್ ಸ್ಟಾರ್ ದರ್ಶನ್ ಭಾರೀ ಜನಪ್ರಿಯತೆ ಗಳಿಸಿದ್ದನ್ನು ಚಿತ್ರತಂಡ ನೆನಪಿಸಿಕೊಳ್ಳುತ್ತದೆ. ಇದೀಗ ಆ ಹೆಸರಿನ ಮುಂದುವರಿದ ಅಧ್ಯಾಯವಾಗಿ ‘ಮೆಜೆಸ್ಟಿಕ್-2’ ಮೂಡಿಬಂದಿದೆ.
ಚಿತ್ರದಲ್ಲಿ ಹಿರಿಯ ನಟಿ ಶೃತಿ ನಾಯಕನ ತಾಯಿಯಾಗಿ ಕಾಣಿಸಿಕೊಂಡಿದ್ದಾರೆ. ನಾಯಕಿಯಾಗಿ ಸಂಹಿತಾ ವಿನ್ಯಾ ಅಭಿನಯಿಸಿದ್ದು, ಕಥೆಗೆ ತಕ್ಕಂತೆ ಹಲವು ಪ್ರಮುಖ ಪಾತ್ರಗಳಲ್ಲಿ ಇನ್ನಿತರ ಕಲಾವಿದರು ಕಾಣಿಸಿಕೊಂಡಿದ್ದಾರೆ.
ಪ್ರಾದೇಶಿಕ ಸೆನ್ಸಾರ್ ಮಂಡಳಿಯಿಂದ ಚಿತ್ರಕ್ಕೆ ಯು/ಎ ಪ್ರಮಾಣಪತ್ರ ಲಭಿಸಿದೆ. ಈಗಿನ ಮೆಜೆಸ್ಟಿಕ್ ಪ್ರದೇಶದ ನೈಜ ಪರಿಸ್ಥಿತಿ, ಅಲ್ಲಿ ನಡೆಯುವ ದಂಧೆಗಳು, ಅಕ್ರಮ ಚಟುವಟಿಕೆಗಳು ಹಾಗೂ ಇನ್ನೂ ಜೀವಂತವಾಗಿರುವ ರೌಡಿಸಂ ಬಗ್ಗೆ ಅಲ್ಲಿಯೇ ಹುಟ್ಟಿ ಬೆಳೆದ ಒಬ್ಬ ಯುವಕನ ಕಥೆಯ ಮೂಲಕ ಚಿತ್ರವನ್ನು ಹೇಳಲಾಗಿದೆ.
ಚಿತ್ರದಲ್ಲಿ ಒಟ್ಟು ಐದು ಹಾಡುಗಳು ಇದ್ದು, ಸಂಗೀತ ಸಂಯೋಜನೆ ವಿನು ಮನಸು ಅವರದು. ವೀನಸ್ ಮೂರ್ತಿ ಛಾಯಾಗ್ರಹಣ, ವಿಜಯಕುಮಾರ್ ಅಸೋಸಿಯೇಟ್ ನಿರ್ದೇಶನ ಹಾಗೂ ಚಿನ್ನಯ್ಯ ಸಾಹಸ ನಿರ್ದೇಶನ ಚಿತ್ರದ ಪ್ರಮುಖ ತಾಂತ್ರಿಕ ಅಂಶಗಳಾಗಿವೆ.
ಮಾಸ್ ಕಥಾಹಂದರ, ಹೊಸ ನಾಯಕನ ಪರಿಚಯ ಮತ್ತು ಮೆಜೆಸ್ಟಿಕ್ ಹಿನ್ನೆಲೆಯ ರೌಡಿಸಂ ಕಥೆ—ಈ ಎಲ್ಲ ಅಂಶಗಳೊಂದಿಗೆ ‘ಮೆಜೆಸ್ಟಿಕ್-2’ ಈ ವಾರ ಸಿನಿಪ್ರೇಮಿಗಳ ಮುಂದೆ ಭರ್ಜರಿ ಎಂಟ್ರಿ ನೀಡಲು ಸಜ್ಜಾಗಿದೆ.