ಕೊಲೆ ಆರೋಪಿಗೆ ಜೀವಾವಧಿ ಶಿಕ್ಷೆ

ತುಮಕೂರು, ನ. ೨೩- ತನ್ನ ಚಿಕ್ಕಮ್ಮನನ್ನೆ ಕೊಲೆಗೈದಿದ್ದ ಆರೋಪಿಗೆ ಇಲ್ಲಿನ ಜಿಲ್ಲಾ ಪ್ರಧಾನ ಮತ್ತು ಸೆಷನ್ಸ್ ನ್ಯಾಯಾಲಯ 20 ವರ್ಷ ಜೀವಾವಧಿ ಶಿಕ್ಷೆ ಹಾಗೂ 1 ಲಕ್ಷ ರೂ. ದಂಡ ವಿಧಿಸಿ ತೀರ್ಪು ನೀಡಿದೆ.
ಉಮೇಶ್ ಎಂಬಾತನೇ ಜೀವಾವಧಿ ಶಿಕ್ಷೆಗೆ ಒಳಗಾಗಿರುವ ಆರೋಪಿ. ಸದರಿ ಆರೋಪಿಯು ಅನ್ಯಕೋಮಿನ ಹುಡುಗಿಯನ್ನು ಪ್ರೀತಿಸುತ್ತಿದ್ದ. ಆಕೆಯನ್ನು ಬೇರೆ ಕಡೆ ಕರೆದೊಯ್ದು ಮದುವೆಯಾಗಲು ಉದ್ದೇಶಿಸಿದ್ದ. ಇದಕ್ಕಾಗಿ ಹಣದ ಅಗತ್ಯತೆ ಇದ್ದುದರಿಂದ ಗುಬ್ಬಿ ತಾಲ್ಲೂಕಿನ ವಡವನಘಟ್ಟ ಗ್ರಾಮದಲ್ಲಿನ ಆತನ ಚಿಕ್ಕಮ್ಮ ಸುಧಾ ಅವರ ಮನೆಗೆ ಹೋಗಿ ಹಣ ಕೇಳಿದ್ದ. ಅವರ ಚಿಕ್ಕಮ್ಮ ಹಣ ನೀಡಲು ನೀರಾಕರಿಸಿದಾಗ ಚಾಕುವಿನಿಂದ ಇರಿದಿದ್ದನೆನ್ನಲಾಗಿದೆ. ಅಲ್ಲದೆ ಆಕೆ ಮೈಮೇಲಿದ್ದ ಚಿನ್ನದ ಓಲೆ, ಮಾಟಿ, ತಾಳಿ ಸಮೇತ ಕರಿಮಣಿ ಸರವನ್ನು ತೆಗೆದುಕೊಂಡು ಹೋಗಿ ಶಿವಮೊಗ್ಗದಲ್ಲಿ ಮಾರಾಟ ಮಾಡಿದ್ದನು.
ಪ್ರಕರಣದ ತನಿಖಾಧಿಕಾರಿ ವೆಂಕಟರಮಣಪ್ಪ ಅವರು ಆರೋಪಿ ವಿರುದ್ಧ ನ್ಯಾಯಾಲಯಕ್ಕೆ ದೋಷಾರೋಪಣ ಪಟ್ಟಿ ಸಲ್ಲಿಸಿದ್ದರು.
ಪ್ರಕರಣದ ವಿಚಾರಣೆ ನಡೆಸಿದ ಜಿಲ್ಲಾ ಪ್ರಧಾನ ಮತ್ತು ಸತ್ರ ನ್ಯಾಯಾಲಯದ ನ್ಯಾಯಾಧೀಶರಾದ ರಾಜೇಂದ್ರ ಬಾದಾಮಿಕರ್ ಅವರು ಆರೋಪಿಗೆ ಈ ಮೇಲಿನಂತೆ ಶಿಕ್ಷೆ ವಿಧಿಸಿದ್ದಾರೆ. ಮೃತ ಸುಧಾ ಅವರ ಪತಿ ಚಂದ್ರಕುಮಾರ್‌ ಅವರಿಗೆ 50 ಸಾವಿರ ರೂ. ನೀಡುವಂತೆಯೂ ಆದೇಶಿಸಿದ್ದಾರೆ.
ಸರ್ಕಾರದ ಪರವಾಗಿ ಸರ್ಕಾರಿ ಅಭಿಯೋಜಕರಾದ ಕೆ.ಎಚ್. ಶ್ರೀಮತಿ ವಾದ ಮಂಡಿಸಿದ್ದರು.

Leave a Comment