ಈ ಬಾರಿ ಮಡಿಕೇರಿಯಲ್ಲಿ ದಸರಾ ಸರಳ

ಅದ್ಧೂರಿ ಇಲ್ಲದೆ ಸಂಪ್ರದಾಯಿಕ ಆಚರಣೆ

ಮಡಿಕೇರಿ. ಸೆ.2- ಇತಿಹಾಸ ಪ್ರಸಿದ್ಧ ಮಡಿಕೇರಿ ದಸರಾವನ್ನು ಈ ಬಾರಿ ಸರಳವಾಗಿ ಆಚರಿಸಲು ದಶಮಂಟಪ ಸಮಿತಿಯಲ್ಲಿ ತೀರ್ಮಾನಿಸಲಾಗಿದ್ದು, ಸ್ಪರ್ಧೆಯನ್ನು ರದ್ದುಪಡಿಸಲಾಗಿದೆ.
ಈ ವರ್ಷದ ದಶಮಂಟಪ ಸಮಿತಿ ಅಧ್ಯಕ್ಷ ದೇಚೂರು ಶ್ರೀ ರಾಮಮಂದಿರದ ರವಿಕುಮಾರ್‌ ಹಾಗೂ ದಸರಾ ಮುಖ್ಯ ಸಮಿತಿಯ ಕಾರ್ಯಾಧ್ಯಕ್ಷ ಮಹೇಶ್‌ ಜೈನಿ ಅವರ ನೇತೃತ್ವದಲ್ಲಿ ಶನಿವಾರ ಸಂಜೆ ನಡೆದ ಸಭೆಯಲ್ಲಿ ಅದ್ಧೂರಿ ಕೈ ಬಿಟ್ಟು ಸರಳವಾಗಿ ಆಚರಿಸಲು ನಿರ್ಧರಿಸಲಾಯಿತು.
ಕೊಡಗಿನಲ್ಲಿ ಮಹಾಮಳೆಯಿಂದಾಗಿ ಈ ಬಾರಿ ಭಾರಿ ಅನಾಹುತವಾಗಿದೆ. ಸಾಕಷ್ಟು ಮಂದಿ ನಿರಾಶ್ರಿರಾಗಿದ್ದಾರೆ. ನೂರಾರು ಕುಟುಂಬಗಳು ಬೀದಿ ಪಾಲಾಗಿವೆ. ಸುಮಾರು 16 ಜನರು ಸಾವಿಗೀಡಾಗಿದ್ದಾರೆ. ಈ ಹಿನ್ನೆಲೆಯಲ್ಲಿ ದಸರಾವನ್ನು ಸರಳವಾಗಿ ಅಚರಿಸುವಂತೆ ದೇವಾಲಯ ಸಮಿತಿಯವರು ಸಲಹೆ ನೀಡಿರುವ ಹಿನ್ನೆಲೆಯಲ್ಲಿ ದಶ ಮಂಟಪ ಸಮಿತಿಯ ಅಭಿಪ್ರಾಯ ತಿಳಿಸುವಂತೆ ರವಿ ಕುಮಾರ್‌ ಅವರು ಕೋರಿದರು.
ಎಲ್ಲ ಸಮಿತಿಯವರು ಪ್ರತ್ಯೇಕವಾಗಿ ತಮ್ಮ ಅಭಿಪ್ರಾಯ ತಿಳಿಸಿದ್ದು, ದಸರಾವನ್ನು ಅದ್ಧೂರಿಯಾಗಿ ಈ ಬಾರಿ ಆಚರಿಸುವುದು ಸರಿಯಲ್ಲ. ಅಲ್ಲದೇ, ಮುಖ್ಯವಾಗಿ ಮಂಟಪದ ವತಿಯಿಂದ ಜನರ ಬಳಿ ಹಣ ಸಂಗ್ರಹಕ್ಕೆ ತೆರಳಲು ಸಾಧ್ಯವಾಗುವುದಿಲ್ಲ. ದಾನಿಗಳು ಕೂಡ ಈ ಬಾರಿ ಸಂಕಷ್ಟದಲ್ಲಿದ್ದಾರೆ. ಒಂದೆಡೆ ಜನರು ಮನೆ, ಆಸ್ತಿ ಕಳೆದುಕೊಂಡಿರುವಾಗ ನಾವು ದಸರಾವನ್ನು ವಿಜೃಂಭಣೆಯಿಂದ ಮಾಡುವುದು ಸರಿಯಲ್ಲ ಎಂದು ತಿಳಿಸಿದರು.
ಈ ಹಿನ್ನೆಲೆಯಲ್ಲಿ ಒಮ್ಮತದ ತೀರ್ಮಾನಕ್ಕೆ ಬಂದಿದ್ದು, ಈ ಬಾರಿ ಸಾರ್ವಜನಿಕ ಹಣ ಸಂಗ್ರಹ ಮಾಡದಂತೆ ಹಾಗೂ ಸರಕಾರ ನೀಡುವ ಅನುದಾನದಲ್ಲಿಯೇ ದಸರಾ ನಡೆಸಲು ಒಪ್ಪಲಾಯಿತು.
 ಸ್ಪರ್ಧೆ ಇಲ್ಲ:
ಮಡಿಕೇರಿ ದಸರಾದ ಪ್ರಮುಖ ಆಕರ್ಷಣೆ ದಶ ಮಂಟಪಗಳ ಶೋಭಾಯಾತ್ರೆ. ಪೌರಾಣಿಕ ಕಥಾವಸ್ತುಗಳನ್ನು ಆಯ್ಕೆ ಮಾಡಿಕೊಂಡು ಕಲಾಕೃತಿಗಳಿಗೆ ಜೀವತುಂಬುವಂತೆ ಚಲನವಲನಗಳ ಮೂಲಕ ಮಂಟಪವನ್ನು ತಯಾರಿಸುತ್ತಾರೆ. ಸುಮಾರು 25 ಲಕ್ಷ ರೂ.ಗಳಿಂದ 30 ಲಕ್ಷ ರೂ.ತನಕ ವೆಚ್ಚ ಮಾಡಿ ಮಂಟಪವನ್ನು ವಿಭಿನ್ನವಾಗಿ ತಯಾರಿಸುತ್ತಿದ್ದರು. ದಶ ಮಂಟಪಗಳ ನಡುವೆಯೇ ಸ್ಪರ್ಧೆ ನಡೆದು ಮೂರು ಬಹುಮಾನಗಳನ್ನು ನೀಡಲಾಗುತ್ತಿತ್ತು. ಈ ದಶ ಮಂಟಪಗಳ ಶೋಭಾಯಾತ್ರೆಯನ್ನು ವೀಕ್ಷಿಸಲು ಕೇವಲ ಕೊಡಗು ಮಾತ್ರವಲ್ಲದೆ ರಾಜ್ಯದ ಬೇರೆ ಬೇರೆ ಪ್ರದೇಶಗಳಿಂದ ಜನರು ಆಗಮಿಸುತ್ತಿದ್ದರು. ಮೈಸೂರು ದಸರಾ ಹಗಲಿನಲ್ಲಿ ನಡೆಯುವುದರಿಂದ ಅದನ್ನು ವೀಕ್ಷಿಸಿ ಹಲವರು ರಾತ್ರಿ ನಡೆಯುವ ಮಡಿಕೇರಿ ದಸರಾಕ್ಕೆ ಆಗಮಿಸುತ್ತಿದ್ದರು.
ಆದರೆ, ಪ್ರಕೃತಿ ವಿಕೋಪದ ಹಿನ್ನೆಲೆಯಲ್ಲಿ ಈ ಬಾರಿ ದಶಮಂಟಪದ ನಡುವೆ ಸ್ಪರ್ಧೆಯನ್ನು ರದ್ದುಪಡಿಸಲಾಗಿದೆ. ಹತ್ತು ಮಂಟಪಗಳು ಈ ಹಿಂದಿನ ಸಂಪ್ರದಾಯದಂತೆ ಸಾಲಿನಲ್ಲಿ ಮೆರವಣಿಗೆ ತೆರಳಲಿವೆ. ಪೇಟೆ ಶ್ರೀರಾಮಮಂದಿರ ಮುಂದೆ ತೆರಳಲಿದ್ದು, ಹಿರಿತನದ ಆಧಾರದ ಮೇಲೆ ಉಳಿದವು ಹಿಂಬಾಲಿಸುತ್ತವೆ. ಬನ್ನಿ ಮಂಟಪದ ತನಕ ಈ ಮೆರವಣಿಗೆ ತೆರಳಿ ಬನ್ನಿ ಕಡಿಯುವುದರೊಂದಿಗೆ ಕೊನೆಗೊಳಿಸಲು ಸಭೆಯಲ್ಲಿದ್ದವರು ತೀರ್ಮಾನಿಸಿದರು.
ಈ ಸಂದರ್ಭ ದಶ ಮಂಟಪ ಸಮಿತಿ ರವಿಕುಮಾರ್‌ ಮಾತನಾಡಿ, ಯಾರೂ ನಿರೀಕ್ಷಿಸದೆ ಇದ್ದ ದುರಂತ ಈ ಬಾರಿ ನಡೆದಿದೆ. ಈ ಹಿನ್ನೆಲೆಯಲ್ಲಿ ಅದ್ಧೂರಿ ಬಿಟ್ಟು ಸಂಪ್ರದಾಯದಂತೆ ಹಬ್ಬ ಆಚರಿಸುತ್ತೇವೆ. ನಾಲ್ಕು ಶಕ್ತಿ ದೇವತೆಯ ಕರಗ ಎಂದಿನಂತೆ ಹೊರಡಲಿದೆ. ದಶ ಮಂಟಪಗಳು ಕೇವಲ ಒಂದು ಟ್ರ್ಯಾಕ್ಟರ್‌ನಲ್ಲಿ ಶೋಭಾಯಾತ್ರೆ ನಡೆಸುವುದು ಉತ್ತಮ. ಯಾವುದೇ ಗೊಂದಲ ಇಲ್ಲದಂತೆ ಸರಳವಾಗಿ ದಸರಾ ಆಚರಿಸಲು ಎಲ್ಲರ ಸಹಕಾರ ಬೇಕು ಎಂದು ಮನವಿ ಮಾಡಿದರು.
ಈ ಬಾರಿ ಸರಳ ದಸರಾದಲ್ಲಿಯೇ ಒಂದೊಂದು ಮಂಟಪದವರು ಕನಿಷ್ಠ ತಲಾ 20 ಸಾವಿರ ರೂ.ಗಳನ್ನು ಉಳಿಸಿದಲ್ಲಿ 2 ಲಕ್ಷ ರೂ.ಗಳು ಸಂಗ್ರಹವಾಗುತ್ತದೆ. ಇದರಲ್ಲಿ ತಲಾ 10 ಸಾವಿರದಂತೆ ಪ್ರಕೃತಿ ವಿಕೋಪದಲ್ಲಿ ತೊಂದರೆಗೀಡಾದವರಿಗೆ ಪರಿಹಾರ ನೀಡಬಹುದು ಎಂದರು. ಇದಕ್ಕೆ ಎಲ್ಲಾ ದೇವಾಲಯದವರು ಒಪ್ಪಿದರು.
ಈ ವರ್ಷ ಸರಳವಾಗಿ ದಸರಾ ಆಚರಣೆ ಮಾಡುತ್ತಿರುವ ಹಿನ್ನೆಲೆಯಲ್ಲಿ ದೇಚೂರು ಶ್ರೀ ರಾಮಮಂದಿರದ ಶತಮಾನೋತ್ಸವವನ್ನು ಕೂಡ ಆಚರಿಸುವುದಿಲ್ಲ, ಈ ಹಿನ್ನೆಲೆಯಲ್ಲಿ ಈ ಬಾರಿ ದಶಮಂಟಪದ ಅಧ್ಯಕ್ಷರಾಗಿರುವ ಈ ದೇವಾಲಯದವರಿಗೆ ಮುಂದಿನ ವರ್ಷವೂ ಅಧ್ಯಕ್ಷ ಸ್ಥಾನ ಬಿಟ್ಟುಕೊಡಲು ತೀರ್ಮಾನಿಸಲಾಯಿತು.
ಸಭೆಯಲ್ಲಿ ದಸರಾ ಸಮಿತಿ ಕಾರ್ಯಾಧ್ಯಕ್ಷ ಮಹೇಶ್‌ ಜೈನಿ, ದಶಮಂಟಪ ಕಾರ್ಯದರ್ಶಿವಿಶ್ವನಾಥ್‌, ಪ್ರಮುಖರಾದ ರಾಜೇಶ್‌ ಬಿ.ಎಂ, ಉಮೇಶ್‌ ಸುಬ್ರಹ್ಮಣಿ, ಪ್ರಕಾಶ್‌ ಆಚಾರ್ಯ ಮುಂತಾದವರು ಹಾಜರಿದ್ದರು.

Leave a Comment