ಆಸ್ಟ್ರೇಲಿಯಾಗೆ ಟೆಸ್ಟ್‌ ರ‍್ಯಾಂಕಿಂಗ್‌ ಪಟ್ಟ : ಐಸಿಸಿ ವಿರುದ್ಧ ಗಂಭೀರ್ ಬೇಸರ

ನವದೆಹಲಿ, ಮೇ 11 -ಇತ್ತೀಚಿಗೆ ಐಸಿಸಿ ಪ್ರಕಟಿಸಿದ್ದ ಟೆಸ್ಟ್‌ ರ‍್ಯಾಂಕಿಂಗ್‌ ಪಟ್ಟಿಯಲ್ಲಿ ಟೀಮ್‌ ಇಂಡಿಯಾ 2016ರ ಬಳಿಕ ಮೊದಲ ಬಾರಿ ತನ್ನ ನಂ.1 ಸ್ಥಾನವನ್ನು ಕಳೆದುಕೊಂಡಿತು. ಕಳೆದ 42 ತಿಂಗಳು ಕಾಲ ಅಗ್ರಸ್ಥಾನದಲ್ಲಿ ವಿರಾಜಮಾನವಾಗಿದ್ದ ಟೀಮ್‌ ಇಂಡಿಯಾ ಹಠಾತ್ ಮೂರನೇ ಸ್ಥಾನಕ್ಕೆ ಕುಸಿದು, ಆಸ್ಟ್ರೇಲಿಯಾ ಮತ್ತು ನ್ಯೂಜಿಲೆಂಡ್‌ ತಂಡ್ಳು ಕ್ರಮವಾಗಿ ಮೊದಲೆರಡು ಸ್ಥಾನ ಅಲಂಕರಿಸಿವೆ.

ಇನ್ನು ಟೆಸ್ಟ್‌ ಕ್ರಿಕೆಟ್‌ನಲ್ಲಿ ಉತ್ತಮ ಪ್ರದರ್ಶನ ನೀಡುತ್ತಿರುವ ಟೀಮ್‌ ಇಂಡಿಯಾ ಏಕಾಏಕಿ 3ನೇ ಸ್ಥಾನಕ್ಕೆ ಕುಸಿದಿದ್ದಾದರೂ ಹೇಗೆ ಎಂದು ಅಭಿಮಾನಿಗಳು ತಲೆ ಕೆಡೆಸಿಕೊಂಡಿದ್ದಾರೆ. ಆದರೆ, ಇದಕ್ಕೆ ಪ್ರತ್ಯುತ್ತರ ನೀಡಿರುವ ಐಸಿಸಿ, ಭಾರತ ಟೆಸ್ಟ್ ತಂಡ 2016-17ರ ಸಾಲಿನಲ್ಲಿ ಗಳಿಸಿದ್ದ ಟೆಸ್ಟ್‌ ರೇಟಿಂಗ್ಸ್‌ ಕಳೆದುಕೊಂಡಿರುವ ಹಿನ್ನೆಲೆಯಲ್ಲಿ ರ‍್ಯಾಂಕಿಂಗ್‌ನಲ್ಲಿ ಕುಸಿತ ಕಂಡಿದೆ ಎಂದು ಹೇಳಿದೆ.
ಭಾರತ ತಂಡವನ್ನು ಹಠಾತ್‌ 3ನೇ ಸ್ಥಾನಕ್ಕೆ ದಬ್ಬಿದ್ದನ್ನು ಪ್ರಶ್ನಿಸಿ ಐಸಿಸಿ ವಿರುದ್ಧ ಭಾರತ ತಂಡದ ಮಾಜಿ ಆರಂಭಿಕ ಆಟಗಾರ‌ ಗಂಭೀರ್‌ ಗುಡುಗಿದ್ದಾರೆ. ಈ ಬಗ್ಗೆ ಸ್ಟಾರ್‌ ಸ್ಪೋರ್ಟ್ಸ್‌ನ ಆನ್‌ಲೈನ್‌ ಕಾರ್ಯಕ್ರಮದಲ್ಲಿ ಮಾತನಾಡಿದ ಗಂಭೀರ್‌, ಐಸಿಸಿ ಟೆಸ್ಟ್‌ ರ‍್ಯಾಂಕಿಂಗ್‌ನ ಅಂಕ ವಿತರಣೆಯ ನಿಯಮಗಳ ಮೇಲೆ ತಮಗೆ ಯಾವುದೇ ನಂಬಿಕೆ ಇಲ್ಲ, ವಿದೇಶದಲ್ಲಿ ಟೆಸ್ಟ್‌ ಗೆದ್ದಾಗಲೂ ಅಷ್ಟೇ ಅಂಗಳನ್ನು ನೀಡುವುದು ಸರಿಯಲ್ಲ ಎಂದಿದ್ದಾರೆ.

“ಭಾರತ 3ನೇ ರ‍್ಯಾಂಕಿಂಗ್‌ ಪಡೆದದ್ದು ಅಚ್ಚರಿಯೇನಲ್ಲ. ಅಂದಹಾಗೆ ರ‍್ಯಾಂಕಿಂಗ್‌ ವ್ಯವಸ್ಥೆ ಮೇಲೆ ನನಗೆ ವಿಶ್ವಾಸವೂ ಇಲ್ಲ. ಅದರಲ್ಲೂ ಐಸಿಸಿ ಟೆಸ್ಟ್‌ ಚಾಂಪಿಯನ್‌ಷಿಪ್‌ನಲ್ಲಿ ಈ ನಿಯಮ ಇನ್ನೂ ಕೆಟ್ಟದಾಗಿದೆ. ತವರಿನ ಟೆಸ್ಟ್‌ ಗೆದ್ದರೂ ಅಷ್ಟೇ ಅಂಕ ವಿದೇಶದಲ್ಲಿ ಗೆದ್ದರೂ ಅಷ್ಟೇ ಅಂಕ. ಇದು ಅನ್ಯಾಯ,” ಎಂದು ಕ್ರಿಕೆಟ್‌ ಕನೆಕ್ಟ್ ಕಾರ್ಯಕ್ರಮದಲ್ಲಿ ಹೇಳಿದ್ದಾರೆ.

“ನನ್ನ ಪ್ರಕಾರ ಭಾರತ ನಂ.1 ಸ್ಥಾನದಲ್ಲಿ ಮುಂದುವರಿಯಬೇಕು. ಏಕೆಂದರೆ ಮನೆಯಾಚೆ ಟೆಸ್ಟ್‌ಗಳನ್ನು ಗೆದ್ದಿದೆ. ಆಸ್ಟ್ರೇಲಿಯಾದಲ್ಲಿ ಸರಣಿ ಜಯಿಸಿ, ಇಂಗ್ಲೆಂಡ್‌ ಮತ್ತು ದಕ್ಷಿಣ ಆಫ್ರಿಕಾದಲ್ಲಿ ಪಂದ್ಯಗಳನ್ನು ಗೆದ್ದಿದೆ. ಹೀಗಾಗಿ ಭಾರತಕ್ಕೆ ನಂ.1 ಪಟ್ಟ ಅರ್ಹ. ಆಸ್ಟ್ರೇಲಿಯಾಗೆ ಅಗ್ರ ಪಟ್ಟ ನೀಡಿರುವುದು ನಿಜಕ್ಕೂ ಅನ್ಯಾಯ. ಏಕೆಂದರೆ ಏಷ್ಯಾ ಭಾಗದಲ್ಲಿ ಆಸ್ಟ್ರೇಲಿಯಾ ಕೆಟ್ಟ ಪ್ರದರ್ಶನ ನೀಡಿದೆ,” ಎಂದು ಐಸಿಸಿ ರ‍್ಯಾಂಕಿಂಗ್‌ ವ್ಯವಸ್ಥೆ ವಿರುದ್ಧ ಗಂಭೀರ್‌ ಗುಡುಗಿದ್ದಾರೆ.

Share

Leave a Comment